Nu dat lohká Aiken Balto guhte ikte gaikkihii láhttoduolbmanmášiinna gáddái Kárášjogas.
Ikte doddjui Kárášjoga gieldda ođđa láhttoduolbmanmášiidna Kárášjohkii bajábealde šalddi. Gieldda bargi galggai vuodjit mašiinna jieŋa mielde Vullošnjárgii, muhto eai lean iskan gierdá go jiekŋa.
– Bealttat eai jorran
Aiken Balto, dat vujii bealtamášiinna mainna gaikkihedje láhttomášiinna gáddái.
– Lei oalle hástalus oažžut dan gáddái go dat láhttomášiidna lei oalle čiekŋalasas liikká. Dasa lassin eai ožžon das jorrat daid bealttaid, nu ahte lei lossat oažžut jiekŋarávdda badjel dan, muitala Balto guhte bargá mášenvuoddjin Tormod Svingeng fitnodagas.
Filmmas oaidnit ahte bealtamášiidna maid ceaggana oalle bajás go lea gaikkiheamen, muhto ii Aiken loga dan leamaš issorassan.
– Dien mađe lossa mášiinnain lea oalle starggas, láve oalle olu galgat loktanit ovdal go gopmána ja die ii lean vuos nu ceaggut, dadjá ieš.
Govven: Inga Marie Guttorm
Rámida plánejeddjiid
Balto muitala iežaset ádjána birrasiid golbma diimmu oažžut láhttomášiinna gáddái.
– Buot manai oalle bures, dat bidje stoalppuid láhttomášiinna vuollái ja visot lei bures plánejuvvon. De lei hui álki dušše čuovvut earáid plánaid, dadjá son ja rámida gielddabargiid ja Alf William Berga geat ledje ovttasráđiid gávnnahan mo lea buoremus gaikkihit mášiinna gáddái.
Vuollelis oainnát filmma das go gádjo mášiinna gáddái.
Dihtet eanet vuossárgga
Dál beaivvi maŋŋil dáhpáhusa ii loga gieldda teknihkalaš jođiheaddji Trygve Nilsen, iežaset vuos diehtit leago mášiidna billašuvvan go čázis lea leamaš.
– Vuossárgga bohtet láhttomášiinna vuovdit geahččat lea go dat billašuvvon moktege, čilge Nilsen.
Govven: Inga Marie Guttorm
Eai bija johtui
Dassážii lohká iežaset šaddat dušše vuorddašit.
– Vuovdit leat gieldán min bidjamis mášiinna johtui. Jus ovdamearkka dihte lea čáhci mannan oljotáŋka sisa de sáhttá mášiidna billašuvvot jus dan bidjat johtui. Maiddái buhtadusa ja garantiijadáfus leat lohkan buoremussan diktit mášiinna orrut, muitala Nilsen.
Nuorta-Finnmárkku politiijaguovlu twitter bokte dieđihii dáhpáhusa birra badjelaš beal ovttas beaivet, ja váile njealjis eahkedis ledje mášiinna ožžon gáddái fas.
