Lávvordaga lágiduvvo dat jahkásaš Čuovžafestivála Stuorajávrris, Guovdageainnus. Oaggungilvu, aktivitehtat ja njálgga biepmut leat oasit maid gávnnat dán festiválas.
Ihttin, lávvordaga, lágiduvvo Čuovžafestivála Stuorajávrris, Guovdageainnus. Erenoamáš dán festiválas leat biepmut maid sii ráhkadit ja vuvdet.
Guollebeavdi
Čuovžafestivála guollebiepmut lea váldogeasuheaddji festiválas.
– Mii leat ráhkadan feara makkár biepmuid guđa iešguđetlágan guolis. Dán mii joatkit dahkat go olbmot liikojit dasa, lohká Stuorajávrri ealáhussearvvi nubbijođiheaddji Ragnhild Muotkajærvi.
Oaggungilvu ja eará aktivitehtat
Festiválas leat gussiide aktivitehtat. Doppe lágiduvvo earret eará oaggungilvu. Oaggungilvvus vuoitá stuorimus, unnimus ja eanemus guliiguin.
– Mis lea maid báhčin, njoarosteapmi ja boksabálkun sidjiide geat eai áiggo oaggut, lohká son.
Stuora beroštupmi festiválii
Maŋemus jagiid lea Stuorajávrri ealáhussearvvis leamaš hui lihkku dálkkiin, ja lea leamaš fiertu. Dán jagi sávvet dieđusge ahte livčče seamma lihkku.
– Maŋemus jagiid lea olbmuin leamaš stuora beroštupmi festiválii, ja juohke jagi leat olu olbmot searvan doaluide. Olu sihkkarit dan dihte go lea leamaš fiertu dán beaivvi. Dálki lea stuora váikkuhussan bohtet go olbmot, nu ahte sávvat dieđusge ahte livčče fiertu dán jagi maid, lohká Muotkajærvi.
Stuora vuordámušat
Dán jagi lágiduvvo Sápmi Pride oktanaga Čuovžafestiválain Guovdageainnus, muhto dán ii oainne hástalussan olbmuid geasuhit festiválai.
– Mus leat hui stuora vuordámušat, ja doaivvun olu olbmuid fitnat min luhtte. Vaikko Sápmi Pride lágiduvvo oktanaga, de aŋkke doaivvun sii geat leat áigon boahtit, bohtet. Sávan goit ahte oallugat válljejit fitnat Čuovžafestiválas Stuorajávrris, loahpaha Ragnhild Muotkajærvi.
