Gielda- ja guovlodepartemeanta lea sádden gulaskuddanevttohusa sámelága giellanjuolggadusaid láhkaásahusa rievdadusaid birra.
Evttohusas lea sáhka das ahte guđet almmolaš ásahusat berrejit geatnegahttojuvvot vástidit čálalaš oktavuođaváldimiid sámegillii.
Evttohuvvon láhkaásahusrievdadusaid ulbmil lea nannet vuoigatvuođa atnit sámegiela čálalaš gulahallamis almmolaš eiseválddiiguin, nu go ovdamearkka dihtii NAV ja NČE.
– Rievdadusat láhčet dili dasa ahte sámi álbmot sáhttá váldit oktavuođa guovddáš, almmolaš orgánaiguin iežaset gillii, mii lea vuođđovuoigatvuohta ja mii lea hui dehálaš sámegiela ja sámi kultuvrra gáhttemii ja ovddideapmái, dadjá sámediggeráđđi Mikkel Eskil Mikkelsen (NSR) preassadieđáhusas.
Ávžžuha sáddet gulaskuddanvástádusaid
Mikkelsen dadjá ahte dat lea earenoamáš dehálaš ášši mas lea stuorra mearkkašupmi sámi giellageavaheddjiide ja ávžžuha danne sámi servodaga sáddet gulaskuddanvástádusaid. Láhkaásahusrievdadusat leat sámelága rievdadusaid čuovvoleapmi, mat doaibmagohte ođđajagemánu 1. beaivvi 2024 ja gulaskuddanáigemearri lea biddjon čakčamánu 27. beaivái dán jagi.
