-Almmuhus-
-Almmuhus-
-Almmuhus-
OĐĐASATOaivvilda FeFo vajáldahttán ahte lea dušše gaskaboddosaš eaiggát

Oaivvilda FeFo vajáldahttán ahte lea dušše gaskaboddosaš eaiggát

-

-

Juristta mielas lea hirpmastuhtti go FeFo orru vajáldahttán ahte leat dušše gaskaboddosaččat biddjon hálddašit Finnmárku mehciid, eaige ipmir geat leat Finnmárkku mehciid rievttes eaiggádat.

Jurista Odd Oskarsen, geas lea riektediehtaga masteroahppu ja lea čállán masterbarggu Finnmárkkulágas, oaivvilda leat hirpmastuhttin go FeFo orru vajáldahttán ahte sii leat dušše gaskaboddosaččat biddjon hálddašit Finnmárkku mehciid.

– Finnmárkkulága ulbmil lea ahte FeFo galgá hálddašit eatnamiid dassái go lea boahtán riektečielggadeapmi geas lea vuoigatvuohta eatnamiidda. Go áigot guoddalit duomu, mas leat gávnnahan ahte Unjárggas leat álbmogis rievttit guovllus, de leat dat imaš, lohká son.

 

Ávžžuhan guoddalit

Ođđajagemánus celkkii Meahcceduopmostuollu duomu Unjárgga-áššis.

Duopmu addá Unjárgga gilisearvái ráđđenrievtti ráddjejuvvon oassái guovllus.

Maŋŋel go FeFo direktevra Jan Olli lea konsulteren Hjort advokáhttafitnodagain, de lea ávžžuhan FeFo stivrra guoddalit Meahcceduopmostuolu duomu Norgga Alimusriektái.

 

Eai ipmirdan

Hjort advokáhttafitnodat, guhte ovddastii FeFo Meahcceduopmostuolus, leat iežaset guorahallamis guovvamánu álggus evttohan guoddalit riektegeavahusa, duođaštusárvvoštallama ja áššemeannudeami.

Oskarsen lea lohkan sin guorahallama, ja oaivvilda ahte lea heajos bargu go eai leat ipmirdan geat leat dat rievttes vuoigatvuođaguoddit Finnmárkkus.

– Sii oaivvildit ahte Norgga stáda okto eaiggáduššá Finnmárkku mehciid. Muhto ii leat imaš go sii leat Lulli-Norgga fitnodat, ja sis ii leat vuođđun historjjálaš duogáš ja máhttu. Seammás sii máksojuvvojit ruđaiguin maid FeFo gáibida go láigoha ja vuovdá álbmoga rivttiid, lohká son.

 

– Dáinna lágiin legaliserejit vearredaguideaset

Oskarsena mielas lea ollu vearrát go FeFo, mii dán rádjái ii leat doahttalan ovttage Finnmárkkukommišuvnna konklušuvnnain, biehttala ášši duohtavuođaid.

– Ferte ain dáguhit sidjiide ahte Norgga stáda ii leat goassige eaiggáduššan Finnmárkku mehciid. Stáda lea duoguštan mehciid go oaivvildedje ahte Finnmárkku álbmot lea «bázahallan, ii sis leat árvu alcceseaset iige stuoraservvodahkii ja leat billahuvvan olbmot». Dáinna filosofiijain lea Norga stáda geahčadan iežas Finnmárkku mehciid ja riggodagaid eaiggádin. Jus Alimusriekti dubme FeFo beallái, mearkkaša dat ahte boahtteáigásaš gáibádusat dain rievttes eaiggádiin dahkkojuvvot duššin, ja nu beassá stáda FeFo bokte legaliseret iežaset vearredaguid, lohká Odd Oskarsen.

Oskarsen sávvá ahte FeFo stivrras lea jierbmi go meannudit ášši ja dohkkehit Meahcceduopmostuolu duomu.

– Muđui han gehččojuvvojit sii dego ođđa hearráálbmogin.

 

– Ii vuoiggalaš čuoččuhus

FeFo direktevra Jan Olli lohká sii eai leat vajáldahttán, go Finnmárkulágas ii boađe ovdan iige čuoččo gostege ahte lea gaskaboddosaš.

– Mu mielas ii leat dat čuoččuhus vuoiggalaš. Finnmárkkulágas čuožžu ahte Finnmárkkukommišuvdna galgá guorahallat rivttiid ja duopmostuolut galget de mearridit. Mii eat leat ieža vuolgán lágastit, muhto duopmostuolut leat mearridan ahte mii leat áššeoasálaččat ja nu leat geatnegahtton lágastit.

 

Duopmostuolut fertejit mearridit

Dasa ahte Norgga stáhta ii leat goassige eaiggáduššan Finnmárkku mehciid, lohká Olli dat leage gažaldat.

Son oaivvilda dan fertet čielggadit ja geardduha ahte lea juste danne duopmostuoluid fertemearridit dan.

– Min oaidnu lea ahte duopmostuolut fertejit mearridit, go de šaddá easka ráfi, lohká FeFo direktevra Jan Olli.

 

 

 

 

 

 

 

 

 

 

 

 

 

-Almmuhus-