-Almmuhus-
-Almmuhus-
GUOIMMUHEAPMI– Oaidnit su moji dahká ahte šaddá buoret beaivi

– Oaidnit su moji dahká ahte šaddá buoret beaivi

-

-

Margrethe Sara Hætta lohká iežas sáneheapmin, go oažžu Ávvira juovlafuomášumi.

– Son lea álo buorremielas. Mu mielas buot buoremus bargi go lea hupmu service birra.

Ná čilge Risten Buljo Margrethe. Margrethe muitala ahte lea veaháš ártet oažžut dakkár fuomášumi.

– Sápmelaččat eai leat hárjánan rámi oažžut, ja de lea veaháš ártet, moddjesta son.

Margrethe bargá beaivválaččat Guovdageainnu doavtterkantuvrras, ja go dohko riŋge, de beassá hállat suinna. Jus olmmoš šaddá fitnat doavtterkantuvrras, de lea Margrethe gávdnamis glássaseainni duohken.

Somá gullat

Risten Buljo čállá viidáset ahte Margrethes lea buorre muitu, ja muitá vissa buot suohkana ássiid riegádandáhtoniid.

– Son sáhttá leaikkastallat ja maid váldit áššiid duođalaččat. Dušše oaidnit su moji dahká ahte olbmos šaddá buoret beaivi, čállá vel.

Margrethe muitala ahte lea somá gullat dakkár sániid iežas birra, ja giitá Ristena go lea nammadan su dákkár fuomášupmái. Dat ligge Margrethe váimmu gullat ahte earát oidnet makkár barggu son dahká iežas barggus.

– Olmmoš lea olmmoš nu mo son lea, ja dat lea dehálaš. In mun ge vásit ahte earát ge leat heajos mielas go riŋgejit ja fitnet, muitala son.

Tuvrii

Margrethe rahpá skeaŋkkaža go Ávvir lea su luhtte, ja lohká dál beassat tuvrii vuolgit go oaččui dakkár skeaŋkka.

Son liiko vánddardit meahcis, ja gizzu maiddái váriin jus lea vejolaš.

Juovlamánu geiget mii Ávviris juovlafuomášumi olbmuide geat ánssášit liigefuomášumi barggu ovddas maid dahket illun earáide. Cavgil midjiide gii ánssášivččii juovlafuomášumi. Čális e-poastta post@avvir.no. Čális oanehaččat manne juste dat olmmoš ánssášivčče juovlafuomášumi.

-Almmuhus-