Barentsčállingotti álgoálbmotbargojoavkkus oaidnit buorren mearkan dan go Ruošša olgoriikaministtar lea mielas lágidit álgoálbmogiidda stuorra deaivvadeami.
Barentsčállingotti álgoálbmotbargojoavkkus oaidnit buorren mearkan dan go Ruošša olgoriikaministtar lea mielas lágidit álgoálbmogiidda stuorra deaivvadeami.
Ii leat mannan ge beannot vahku das rájes go Oului čoagganedje Barentsguovllu olgoriikaministarat ja eará alladasi politihkkarat Danmárkkus, Islánddas, Suomas, Norggas, Ruoŧas, Ruoššas ja EU:s.
Deaivvadeami deháleamos dáhpáhussan šattai Barentsguovllu formálalaš stivrejumi sirdin Suomas Ruššii.
Lavrov bovde čoahkkimii
Ruošša olgoriikaministtar Sergey Lavrov galgá guokte jagi ovddosguvlui jođihit Barentsguovllu politihkalaš doaimmaid. Sártnistis Lavrov namuhii ahte álgoálbmotáššit leat dehálaččat barggustis ja stivrenáigodagas oaidná dárbun lágidit álgoálbmotsummita. Barentsčállingotti álgoálbmotbargojoavkkus oaidnit dan buorren mearkan go álgoálbmogat Ruošša bealde dan áiggi leat garra deattu vuolde. Čakčat Yasavey Manzara nenetsaorganisašuvdna heaittihii iežas doaimma go lei ožžon «olgoriikaageantta» stempila. Dasa lassin álgoálbmogiid návdet separatistan. Visot dát lea dramáhtalaš ii ge buvtte buori álgoálbmotovttasbargui Barentsguovllus mii lea jo leamaš doaimmas badjel 20 jagi.
– «Olgoriikaageantta» láhka sáhttá bidjat Barentsguovllu álgoálbmogiid ovttasbarggu álgoálbmogiid hearkkes dillái. Muhto Ruošša olgoriikaministara dahku addá doaivaga, lohká Barents guovllu álgoálbmotbargojoavkku jođiheaddji Christina Henriksen.
LOGA MAID: – Olgoriika ageanta Barentsguovllus
LOGA MAID: – Heaittiha doaimmaid
Ruošša olgoriikaministtar Sergey Lavrov šattai árrat vuolgit Oulus go galggai čuovvut Putina eará dáhpáhusa Kasakhstanas. Oului bázii ministara várreságadoali Vladimir Titov, gii maŋŋá searvvai preassakonferánsii ja vástidii gažaldagaid.
Preassakonferánssas earret eará Ruošša olgoriikaministerija várreságadoalli deattuhii man dehálaš lea gudnejahttit álgoálbmogiid vuoigatvuođaid ja rivttiid.
– Iežan sáhkavuorus namuhin hástalusaid ovttasbarggus go lea leamašan čoahkkin ministariiguin ja dasto ožžon buriid mearkkašumiid ja oaiviliid preassakonferánssas, muitala Christina Henriksen.
