Dán vahkku bohtet ovcci politihkalaš ráđđeaddi Eurohpáparlameanttas Davvi-Norgii. Sii áigot oahpásmuvvat Davvi-Norgga dálkkádahkii, kultuvrii, guolásteapmái internašunála ovttasbargui ja sihkarvuhtii.
Dán vahkku bohtet ovcci politihkalaš ráđđeaddi Eurohpáparlameanttas Davvi-Norgii. Sii áigot oahpásmuvvat Davvi-Norgga dálkkádahkii, kultuvrii, guolásteapmái internašunála ovttasbargui ja sihkarvuhtii.
– EU gohčoda buot guovlluid, mat lea bajábealde poláragierddu, Árktalaš guovlun. Midjiide lea dehálaš čájehit ahte Davvi-Norga lea earálágan go eará oasit árktalaš guovlluin. Mis leat servvodagat mat leat bures ovdánan, ja áibbas eará dálkkádat go eará guovlluin mat leat seamma govdodatceahkis máilmmis, muitala Davvi-Norgga Eurohpákantuvrra direktevra Trond Haukanes.
Ohppet Davvi-Norgga birra
Guovvamánu 20. beaivvis gitta 24. beaivái galgá Davvi-Norgga Eurohpákantuvra oahpahit ovcci politihkalaš EU-parlameanta ráđđeaddi Davvi-Norgga birra. Máŋggas sis eai leat goassege leamaš davábealde poláragierddu, ja illudit oahppat Davvi-Norgga birra.
Sii galget finadit Bådådjo Váldogádjunguovddážis, Ánddasullo Space Centeris, Romssa Polárainstituhtas, Barentsčállingottis Girkonjárggas ja Ruošša ráji luhtte. Dasa lassin galget sii deaivvadit sátnejođiheddjiiguin ja beassat vásáhusaid vásihit.
Mearrádusat mat váikkuhit Norgii
– Mii áigut ahte EU mearrideaddjit galget vásihit Davvi-Norgga kultuvrra, ealáhusa ja dálkkádaga, nu ahte mearrádusat maid dahket leat gealbbu ja vásáhusaid vuođul, eai ge doaivvo ahte buot árktalaš guovllu leat jiekŋaguovlun, muitala Haukanes.
Vaikko Norga ii leat EU-miellahttu, de dahkkojuvvojit mearrádusat EU:s, mat čuhcet Davvi-Norgii. Njukčamánu álggus galgá EU-parlameanta mearridit oktasaš Árktalaš politihka, mii sáhttá váikkuhit turismma ja eará doaimmaid davvin.
Dehálaš eksportamárkan
– Norga eksportere mearrabiepmuid 50 miljárdda ovddas EU-riikkaide, ja lea deháleamos mearrabiebmomárkan Norgii. EU:s leat maid eará prošeavttat mearrabiebmoealáhussii ja maritiima resurssaid ovdánahttimii. Dát prošeavttat gusket maid Norgga beroštumiide, muitala Haukanes.
Gearggusvuohta ja ovttasbargu
Gearggusvuohta Davvi-Norggas lea maid fáddán man Davvi-Norgga Eurohpákantuvra háliida čalmmustahttit gussiide.
– Norggas lea viiddis mearraguovllut gos doaimmat dušše lassánit, ja buorre ovttasbargu EU-riikkain, nu go Ruoŧain ja Suomain, lea dehálaš vai doalahit sihkarvuođa eatnamis ja čáziin, loahpaha Haukanes.
