Porsáŋggu gielddas lea ođđa fálaldat mánnaolbmuide, kursa gos ohppet váhnenrolla birra.
Dán mánu rájes lea Porsáŋggu gielddas Dearvvašvuođastašuvnnas ođđa fálaldat váhnemiidda, go de bidjet johtui vuosttaš bagadallankurssaid váhnemiid váste. Gielda doallá guokte kurssa boahtte čavčča ja guokte fas boahtte giđa. Kurssat leat oassin váhnenbagadallanprográmmas «Trygghetssirkelen (COS)».
– Váhnenbagadallankurssat leat oaivvilduvvon váhnemiidda geain leat mánát vuollel skuvlaagi, muhto vásáhusat leat čájehan ahte kursa lea ulbmillaš buot agát mánáid váhnemiidda, čállá Porsáŋggu gielda gieldda neahttasiiddus.
Gielda čállá ahte mihttun kurssain lea veahkehit váhnemiid šaddat vel buoret váhnemin iežaset mánáide. Kursa lágiduvvo joavkkuin mas sáhttet leat mielde eanemusat gávcci váhnema oktanaga. Kursa bistá gávcci vahkku ja leat oktiibuot gávcci 1,5-2 diibmosaš deaivvadeami daid vahkuid. Kursii lea nuvttá searvat.
