Oahpahit mánáid meahcástallama birra

Oaggun, kárta ja kompássa, dolasteapmi ja njoarosteapmi leat muhtun aktivitehtat maid mánát besset geahččalit ja oahppat go servet olgoskuvlii.

Juohke geasi lágida Finnmárkku Olggostallanráđđi olgoskuvlla gaskal 10- ja 14-jahkásaš mánáide. Olgoskuvla lea stuora ja dehálaš bargu olggostallanráđiide Davvi-Romssa ja Finnmárkku olggostallanráđiide.

Ulbmil olgoskuvllain lea oahpahit mánáid meahcástallama birra. Olgoskuvla galgá leat positiiva ja luopmofálaldat lagasbirrasis. 

Sávvet eambbosiid dieđihit

Dieđiheapmi olgoskuvlii lea rahpon ja buot gaskal 10- ja 14-jahkásaš mánát leat bures boahtimat searvat. Muhtumin lea nu maid ahte nuorabuidda ja boarráseappuide maid lea vejolašvuohta searvat.

Finnmárkku Olggostallanráđi beaivválaš jođiheaddji, Hugo Tingvoll muitala juo guhtta máná dieđihuvvon, muhto lea sadji ain máŋgasii. 

– Dán rádjái leat dušše guđas dieđihuvvon, ja dat lea beare unnán. Go 12 dieđihuvvet de lea áibbas sihkar ahte šaddá olgoskuvla Guovdageainnus. Vuordit birrasii 20 máná, dadjá Tingvoll.

Seamma báikkis go diibmá

Diimmá olgoskuvla lágiduvvui Iŋgirmohkis masa 18 máná serve. 

– Dán jagi šaddá seamma báikkis, sullii seamma lágideapmi.

Leat Álttás olgoáibmodoaibmastudeanttat geain lea váldoovddasvástádus čađaheapmái, muhto báikkálaš olmmoš, Anton Dahl, galgá maid leat mielde.

– Mii leat ožžon meahcástanberošteaddji gii lea oahpis Guovdageainnus mielde. Sivvan dasa lea vai lágideddjiin lea sámi máhttu, muitala Tingvoll.

Iešguđetlágan aktivitehtat

Oaggun, kárta ja kompássa, dolasteapmi, bádet, luonddubálgá, báhčin áibmobissuin, njoarosteapmi, dávgebáhčin, meallun, vuollan, olgoeallin, idjadeapmi ja eará stohkosat ja aktivitehtat leat oassin olgoskuvllain miehtá Finnmárkku. 

Juste mo Guovdageainnus šaddá, lea vuos eahpesihkar.

– Skuvla lea njeallje beaivvi mas idjadeapmi maŋemus ija lea sidjiide geat dan háliidit.

Olgoskuvllat Finnmárkkus