Lea go dus lagas olmmoš geas lea demeansa ja háliidivččet diehtit eambbo dán dili birra? De lea dát kursa dutnje
Lea go dus lagas olmmoš geas lea demeansa ja háliidivččet diehtit eambbo dán dili birra? De lea dát kursa dutnje
Guovdageainnu suohkan ovttas Guovdageainnu demeansaservviin doalla oapmahaččaidskuvlla demeansabuhcciid oapmahaččaide, fulkkiide ja lagas olbmuide.
Fágaolbmot logaldallet demeanssa birra
Oapmahaččaidskuvla lea nuvttá sidjiide geat háliidit oahppat eambbo demeansabuozanvuođa birra. Kurssás leat fágaolbmot geat logaldallet ja biddjo áigi ságastallamiidda ja digástallamiidda.
Kurssas váldojit ovdán fáttát nu go earret eará oapmahaččaid vásáhusat, hástaleaddji láhttenvuohki, demeansabuhcciid ja sin oapmahaččaid vuoigatvuođat, veahkaváldin lagas relašuvnnain ja veahkke- ja dikšunfálaldagat suohkanis.
Logaldallamat dulkojuvvojit ja gussiide lea guossoheapmi. Buohkat geat beroštit gullát eambbo dán birra ožžot boahtit čuovvut kurssá, ii dárbbaš dieđihit ovdagihtii, dieđiha Guovdageainnu demeansasearvi Facebookas.
Njeallje kursaeahkeda
Oapmahaččaidskuvla lágiduvvo 4 eahkeda ja buot kurššat dollojuvvojit dearvvašvuođaguovddážis Guovdageainnus. Kurssat leat mánnodaga 23.10.17, distaga 24.10.17, mánnodaga 30.10.17 ja distaga 31.10.17. Buot kurssbeaivvit álget diibmu 17.00 ja bistet diibmu 20.00 radjái.
