Sámediggi ja Oahppodirektoráhtta leat ovdánahttán ođđa neahttaresurssa oahpahussii doarjjan.
Dán neahttaresurssa bokte oažžu dieđu ja máhtu guovddáš sámi diliid birra. Skuvllat sáhttet dan vuolggasadjin geavahit go plánejit oahpahusa ohppiide. Sámi sisdoallu lea oassin šaddan vuođđooahpahusa fágaide bajitdási árvvuid ja prinsihpaid bokte, ja fágaođastusa iešguđetlágan oahppaplánain. Skuvla sáhttá bargat sámi sisdoaluin sihke ovtta fága siskkobealde ja iešguđetlágan fágaid rastá.
– Buot oahppit Norggas galget beassat oahppat sámi historjjá, kultuvrra, servodateallima ja vuoigatvuođaid birra. Sámi kultuvra lea oassi min oktasaš kulturárbbis ja dat lea oahppaplánas čielggaduvvon. Danne lean ilus go Oahppodirektoráhta ja Sámediggi leaba ráhkadan dán resurssa. Dieđán ahte olu oahpaheaddjit leat sávvan eanet doarjagiid ja eanet reaidduid sámi sisdoalu oahpahanbargui. Sávan ollugat atnigohtet dan, dadjá máhtoministtar Tonje Brenna (Bargiidbellodat) preassadieđáhusas.
Ođđa digitála doarjjaresurssas leat evttohusat sámi sisdollui fágain RREE, borramuš ja dearvvašvuođas ja servvodatfágas. Stuora oassi sisdoalus sáhttá maid guoskat eará fágaide.
Dehálaš loktet sámi gelbbolašvuođa skuvllas
– Sámediggái lea dehálaš hukset sámi gelbbolašvuođa skuvllaide, nu ahte sihke oahpaheaddjit ja oahppit ožžot doarvái máhtu sámi diliid birra. Ii leat dušše skuvlla geatnegasvuohta, muhto maiddái buot ohppiid vuoigatvuohta beassat oasi váldit ja oahppat sámi álbmoga birra ja máŋggakultuvrralaš servvodaga birra mas mii eallit. Resursa addá máhtu sámi diliid birra mii fas addá buriid miellaguottuid ja eastada ovdagáttuiguin ja vealaheamis, dadjá sámediggeráđđi Mikkel Eskil Mikkelsen geas lea earret eará ovddasvástádus oahpahussuorggis Sámedikkis.
– Dát resursa lea sihke jearahuvvon ja dehálaš oahpaheddjiide. Leat olu sámi oahpaheaddjit geat leat váikkuhan bargui sin čehppodagain, lohká sámediggedirektevra Inger Marit Eira-Åhren.
Doarjjaresurssa ulbmiljoavku leat buot oahpaheaddjit vuođđoskuvllas beroškeahttá fágas. Dás sáhttet gávdnat evttohusaid sámi sisdollui, áigeguovdilis dávistangažaldagaide, gelbbolašvuođamihttu ovdamearkkaid gos sámi sisdoallu lea oassi, ja liŋkkaid eará resurssaide.
Galgá ovddidit ohppiid smiehttama
– Mii leat guhká oaidnán ahte livčče dárbu eanet máhttui sámi kultuvrra, giela ja servodaga birra skuvllas. Danne lean hui movttet go mis lea leamaš nu buorre ovttasbargu Sámedikkiin sisdoalu birra ja ođđa doarjjaresurssa bargguin. Dál sávvat ahte dát buvttášii skuvllaide movtta ja fágalaš lasáhusa bargat sámi sisdoaluin oahppaplánas, dadjá Oahppodirektoráhta direktevra Morten Rosenkvist.
Doarjjaresursa addá dieđuid ja máhtu guovddáš sámi diliid birra, ja skuvllat sáhttet atnit dan go plánejit oahpahusa ohppiide. Go oahppit barget iešguđetlágan váttisvuođačuolmmaiguin, de sáhtášii resurssa fáttáid bidjat oassin ovddidan dihtii jurddašeami ja kritihkalaš smiehttama.
