Ruoŧa skuvlamánát galget oahppat viđa unnitčeardda álbmoga historjjá, muhto nuoraidskuvllaid oahpaheaddjit garvet dan oahpahusa, čájeha guorahallan man Sveriges Radio lea dahkan.
Sveriges Radio unnitčearddaid redakšuvnnat ja 12 báikkálaš kanála P4 kanálas leat čađahan guorahallama, man Sveriges Radio dál almmuha preassadieđáhusas.
Oahpaheaddjit eai loga máhttit
Juvddálaččaid, romániálbmoga, ruoŧasuopmelaččaid, Duortnusleagi olbmuid ja sámiid birra oahpahit historjjálaš beliid, lea geatnegahtton oassi maid nuoraidskuvlladásis galget oahppat.
Dál čájehuvvo ahte oahpaheaddjit nuoraidskuvlla dásis garvet oahpaheames unnitčearddaid birra Ruoŧas.
Guorahallamis vástidedje oahpaheaddjit ahte sis ii leat doarvái máhttu fáttá birra ja ahte eai vuorut dán fáttá.
– Mu máhttu ii leat buorre. Ii lean oassin oahpaheaddjeoahpahusas in ge leat ožžon fálaldaga oahppat dan birra maŋŋel. Oahppogirjjiin ii leat dan birra, muitala okta oahpaheaddji guorahallamis.
Ollu oahpaheaddjit lohket ahte sii eai obage oahpat riikka unnitčearddaid historjjá birra ja vuollel bealli lohket ahte sii oahpahit buot unnitčearddaid birra Ruoŧas.
Badjel bealli searvvai guorahallamii
298 historjjáoahpaheaddji miehtá Ruoŧa ožžo fálaldaga vástidit oaiviliskkadeami gažaldagaid riikka unnitčearddaid birra maid nuoraidskuvlla oahppit galggaše oahppat.
63 proseantta serve oaiviliskkadeapmái, muitala Sveriges Radio preassadieđáhusas.
