-Almmuhus-
OĐĐASATOahpaheaddji hálidii 9-jahkásaččain sexa

Oahpaheaddji hálidii 9-jahkásaččain sexa

-

-

Sis-Finnmárkku dievdu lea áššáskuhtton vurkkodan rohcošangovaid ja ovdanbuktán mánáid seksuálalaš illasteami oktavuođas.

Romssa ja Finnmárkku stáhtaadvokáhtta lea áššáskuhttán dán čihččetlot jahkásaš dievddu Sis-Finnmárkkus.

Dievdu lea áššáskuhtton go galgá leat buvttadan dahje vurkkodan ovdanbuktimiid mat čájehit mánáid seksuálalaš illasteami, dahje čájehit mánáid seksuálalaš oktavuođas.

 

136 gova ja 8 filmma

Áššáskuhttima vuođđu lea guovtti oasis.

Vuos dat go jagiin 2010 rájes gitta njukčamánu 2018 rádjai lea háhkan interneahta bokte unnimusat 136 gova ja gávcci filmma mat bistet 40 minuhta oktiibuot, main mánát leat seksuála dilis eará mánáiguin dahje rávesolbmuiguin.

 

Nieiddažiid hástalan

Nubbi oassi lea go son galgá 2015 rájes Skype bokte čálašan njeljiin olbmuin, geat muitaledje sii leat nieiddažat ovcci jagis gitta 15-16 jahkái.

Dievdu galgá leat mánáid govvidan dahje čilgen seksuála dilis sihke chattas ja iežas čállosiin.

Son lea maid čilgen sidjiide makkár seksuálalaš daguid son áiggošii singuin dahkat.

 

Njeallje nieiddaža

Earret eará galgá son ovccejahkásaš nieiddažii čálašan ahte son háliidivččii suinna deaivvadit ja lea čálašan earret eará váginálas anašeami birra.

Son oaččui dán nieiddaža sáddet seksuálalaš govaid alcces, ja lea suinna čálašan maid nieiddaža ja nieiddaža ádjá seksuála anašeami birra.

13-jahkásaš nieiddažii lea son maid čállán son háliida deaivvadit, ja lea čilgen dárkilit makkár seksuálalaš daguid suinna áiggui.

Suinna galgá maid čálašan nieiddaža ja su vuolleahkásaš vielja seksuála daguid birra. Dasa maid gullá váginálas anašeapmi.

12 jahkásaš nieiddažii lea son maid čállán son háliida deaivvadit ja čilgen hui konkrehta maid áigu suinna dahkat.

Maiddái muhtin 15 dahje 16 jahkásaš nieiddažii lea čállán son háliida deaivvadit suinna ja čállán makkár seksuála daguid háliidii suinna ja su nieidaustibiin.

Dát nieida lea sádden divdui álás govaid.

 

Iežas ohppiide sáddii unohis dieđuid

Dán dievddu birra lea Ávvir ovdal čállán, go son lei oahpaheaddji.

Čakčat 2017:s dutke politiijat su go galggai leat sádden heivetmeahttun dieđuid vuolleahkásaš ohppiide.

Politiijat muitaledje dalle ahte lei eahpádus lea go dieđuid sisdoallu seksuálalaš loavkašuhttin, ja oahpaheaddji gohčodii daid dalle leaikan, rápmin ja boasttu ipmárdussan.

Oahpaheaddji ii galgga leamaš šat dan barggus maŋŋel dán.

Dát dáhpáhusat eai leat oassin dán áššáskuhttimis mainna dievdu galgá Sis-Finnmárkku diggegoddái golggotmánus dán jagi.

 

Guhtta jagi ráŋggáštus

Áššáskuhtti eiseváldi, stáhtaadvokáhtta Hugo Henstein čilge iFinnmark aviisii ahte go sii eai dieđe makkár olbmuiguin lea chatten, ahte ledje go duođas nieiddažat 9-, 12-, 14- ja 15-16 jahkásaččat geaiguin lea gulahallan, de ii leat son áššáskuhtton ráŋggáštuslága 306 mielde.

Dat paragráfa gieđahalašii šihttojuvvon deaivvademiid, ng. grooming, main lea ulbmil beassat illastit mánáid seksuálalaččat.

– Muhto ráŋggáštusmearri dán áššáskuhttimis lea golbma jagi, ja go leat guokte dáhpáhusa, de šaddá guhtta jagi, dadjá Henstein aviisii.

Ávvir ii lihkostuvvan oažžut dievddu bealušteaddji Trond Biti ságaide.

-Almmuhus-