Guovdageainnu suohkan ja demeansasearvi dollet oapmahaččaidskuvlla demeansabuhcciid oapmahaččaide, fulkkiide ja oahppásiidda.
Lea go dus demeansabuozanvuohta bearrašis dahje lagas birrasis, ja áiggošit oahppat eambbo dan birra – de lea suohkanis dutnje fálaldat!
Guovdageainnu suohkan ja Guovdageainnu demeansasearvi dollet demeansabuhcciid oapmahaččaide, fulkkiide ja oahppásiidda oapmahaččaidskuvlla. Skuvla bistá njeallje gaskavahkku, ja lea dearvvašvuođaguovddážis. Vuosttaš skuvlabeaivi lea odne.
Skuvla lea nuvttá fálaldat daidda geain lea beroštupmi oahppat eambbo demeansabuozanvuođa birra.
Muhtun fáttát skuvllas:
- Mii demeansabuozanvuohta lea.
- Čielggadeapmi ja čuovvoleapmi.
- Hástalusat.
- Gulahallan demeansabuhcciiguin.
- Oapmahaččaid vásáhusat.
- Lágat. Demeansabuhcciid ja sin oapmahaččaid vuoigatvuođat.
- Veahkke- ja dikšunfálaldagat suohkanis.
- Veahkkeneavvut.
