Juohke jagi goaikkeha 100 miljárdda ruvnno suohkaniidda ja ealáhusaide miehtá Norgga. Dál áigot finnmárkulaččaide oahpahit movt galgá olahit doarjjaortnegiid.
Guovvamánus lágiduvvo kursa mas oahpat gávdnat ruhtadoarjagiid. Sihke vuođđudeddjiin, ealáhusain, báikkálaš politihkkáriin ja byråkráhtain lea ollu oahppat, ja kursa lea vuosttažettiin sin várás.
– Mii háliidit veahkehit daid ollu buriid prošeavttaid ollašuhttit Finnmárkkus. Dan lea vejolaš nagodit, muhto lea váttis gávdnat gos ohcá doarjaga suhkkes doarjjavuovddis. Dan dihte lágidit dál beaivekurssa mii galgá ofelažžan suhkkes vuovddis, muitala bojl.no ruhtadoarjjačeahppi Anders A. Vik.
Eará ládje oahpat jurddašit
Kurssas oahppá viidát ja eará ládje jurddašit, vai heivehaha prošeavtta vuohkkaset eavttuide mat leat doarjagiin.
– Eanet gelbbolašvuohta doarjjaortnegiid birra buktá ekonomalaš loktaneami olles Finnmárkui, muitala Vik.
– Stuora resurssat vurdet buriid ohcamušaid, ja mihttu lea nagodit eanet ja buoret ohcamušaid sáddet sihke suohkaniin ja ealáhusain. Juohke jagi bohtet ođđa doarjjaortnegat, ja earát ges heaittihuvvojit. Kurssas oahpat rievttes guvlui johtit amas luottain, lohká son.
Kurssat Finnmárkkus lágiduvvojit Hámmárfeasttas, Álttás ja Honnesvágis, ovdal go lágiduvvo Romssas ja eará fylkkain.
