-Almmuhus-
-Almmuhus-
OĐĐASATOaguhii bohccuid guorbme­biillain – Dál lea duopmu celkon

Oaguhii bohccuid guorbme­biillain – Dál lea duopmu celkon

-

-

Guorbmebiilavuoddji, gii 2019:s oaguhii čorraga luoddaráigge Árjjatluovi guovllus Norrbottenis seammás go filbmii dagu, lea dál dubmehallan. Čearu bealis lea deaŧalaš ahte son ránggastuvvo.

Videofilbma go vuojeha čorraga ja almmuhuvvui Facebook-jovkui, oaččui garra moaitámušaid ja reakšuvnnaid. Olusat váide maid ášši politiijade ja nu dagai maiddái Semisjaur-Njarg čearru gos dáhpáhus geavai. Gaskavahku, geassemánu 8. beaivvi 2022, dubmehalai guorbmebiilavuoddji diggerievttis Norrbottenis.

– Diggeriekti dubme 25-jahkásačča elliidbiinnideamis go oaguhii čorraga guorbmebiillain. Son oažžu evttolaš duomu ja šaddá máksit 4820 ruvdnosaš vahátbuhtadusa Semisjaur-Njarg čerrui. 

Loga maid:
  – Dá lea duođalaš ášši ja vuoddji rihkku máŋga lága

Prinsihpalaččat deaŧalaš

Semisjaur-Njarg čearu ságadoalli Anders Erling Fjällås dadjá Ávvirii ahte lei prinsihpalaččat hirbmat deaŧalaš ahte son dubmehalai Luleju diggerievttis elliidbiinnideamis.

– Diggi lea cealkán ahte dakkár vearredagut eai leat dohkálaččat. Sii deattuhit ahte lea vearredahku ja dat lea deaŧaleamos midjiide, dadjá son. 

Sáhku máksit

Duomus lea čállon ahte ráŋggáštus ii sáhte leat dušše sáhkku čerrui.

– Diggeriekti oaivvilda ahte vuoddji lea diehtán maid dahká. Muhto ránggastusárvu ii sáhte leat eanet go mánu giddagasas. 

Čearu ságadoalli Anders Erling Fjällåsa mielas ii leat deaŧaleamos man olu šaddá máksit sáhkkun čerrui.

– Deaŧaleamos lea ahte diggeriekti lea dubmen ahte dan maid son dagai lei vearredahku. Dat lea stuorimus vuoitu midjiide, oaivvilda son. 

Liigegolut čerrui

Čearu olbmot šadde ohcat bohccuid meahcis maŋŋel dáhpáhusa ja iskat gos dat lei dáhpáhuvvan. 

– Dat dagahii liigegoluid čerrui justa dalle go dáhpahuvai vearredahku, muitala čearu ságadoalli Anders Erling Fjällås.

DEAŦALAŠ DUOPMU: Ruoŧa Sámiid Riikkasearvvi Matti Berg Blind ja jurista Jenny Wik Karlsson cealkiba ahte lea buorre go duopmu celkui go lea čielga vearredahku ja rihkku sihke elliidbiinnidanlága ja boazodoallolága, oaivvildeaba soai. Govva: Preassagovva. 
DEAŦALAŠ DUOPMU: Ruoŧa Sámiid Riikkasearvvi Matti Berg Blind ja jurista Jenny Wik Karlsson cealkiba ahte lea buorre go duopmu celkui go lea čielga vearredahku ja rihkku sihke elliidbiinnidanlága ja boazodoallolága, oaivvildeaba soai. Govva: Preassagovva. 

Elliidbiinnideapmi

Ruoŧa Sámiid Riikkasearvvi Matti Berg Blind ja jurista Jenny Wik Karlsson cealkiba ahte lea buorre go duopmu celkui go lea čielga vearredahku ja rihkku sihke elliidbiinnidanlága ja boazodoallolága, oaivvildeaba soai.

– Lea deaŧalaš ahte diggeriekti lea dubmen dan eallidbiinnideapmin. Lea diehtu ja signála servodagas ahte ii lea dohkálaš bohccuid binniidiid, dadjá Blind.  

Duopmu deaŧalaš

Wik Karlsson oaivvilda ahte lea čielggas eiseválddiid bealis ahte dakkár dagut eai leat dohkálaččat ja ahte lea riska ahte dubmehallá jus bargá dakkáriid.

– Mis leat beare olu sullasaš áššit main olbmot eai goassege dubmehala. Danin lea prinsihpalaččat deaŧalaš ahte duopmu bođii. Lea earenoamáš deaŧalaš badjeolbmuide go leat sin bohccot, cealká jurista Jenny Wik Karlsson.

Čavgen lága

Ruoŧŧa lea 2017:s čavgen eallidbiinnidanlága Riikabeaivvis. Ráŋggaštuš roavva eallidbinnideamis galgá unnimusat jagi giddagasas ja eanemus njealje jagi giddagasas. 

– Guokte boandda dubmehalaiga guovtti mánnui giddagasisi go leaigga binniidan roavvát iežaska gusaid dassá go jápme, čállá Ruoŧa Riikabeaivi. 

Vuolle-Ruoŧas dubmehalai okta njealji mánnui giddagassii go lei binniidan iežas heasttaid. 

Eanet váidagat

Ruoŧa Sámiid Riikkasearvvi Matti Berg Blind ja jurista Jenny Wik Karlsson sávvaba ahte dat duopmu dagaha ahte eanebut váidet sullašas áššiid.

– Sávvat olbmuid váidit vaššiáššiid badjeolbmuid ja bohccuid vuostá. Jus eai váidde, de dat rihkusáššit, nu go elllidbiinnideapmi ja vaššiáššit dušše jotket, cealkiba soai preassádieđáhusa bakte. 

Luleju diggerievtti duomu guorbmebiilavuoddji vuostá sáhttá guoddalit Bajit Norrlándda Hoavvariektái maŋemusat geassemánu 29. beaivvi 2022. 

Loga maid:
– Deaŧalaš ahte eise­válddit dubme­jit guorbme­biila­vuoddji 

-Almmuhus-