-Almmuhus-
-Almmuhus-
GUOIMMUHEAPMIOaggungilvvu vuoitit

Oaggungilvvu vuoitit

-

-

Ikte loahpahuvvoi Ávvira oaggungilvu ja dás beasat oaidnit geat vuite skeaŋkakoarttaid.

Ávviris lea dán geasi leamašan oaggungilvu, mii loahpahuvvui ikte. Muhto ovdal go almmuhat geat vuite skeaŋkakoarttaid de fertiimet vuos vuorbádit maŋimuš vahkku «Guollelihkku» vuoiti.

 

Maŋimuš vahkkus eai lean searván eará go golmmas gilvui mii lei mánáid várás, ja 6-jahkásaš Thea Marianne Kemi vuorbáduvvui vuoitin, ja oažžu ge oaggunstákku man FeFo lea sponsen.

Son searvvai dorskiin man lei goddán mearas Ittunjárggas. Son ii lean vihkkehan guoli.

– Gottii vuosttaš geardde guoli ieš. Ieš veahá suorganii go dohppii ja ii duostan nu lahka mannat dan guoli go gáddái oaččuimet, dan dihte ii doala guoli govas, čálle su váhnemat go lasihedje gova min oaggungilvui.

(Ášši joatká gova vuolábealde)


MAŊIMUŠ VAHKKOVUOITI: Ii duostan nu lahka dan guoli, muhto amma hal dál go oaggunstákku lea vuoitán šaddá vel eambbo oaggut.
Priváhtagovva

Gilvvu maŋimuš vahkkus eai searvan ollesolbmot, nu eat juoge Luossagonagas dahje -dronnet gaibagahpira odne.

Min gilvvus ledje guokte luohká, Luossagonagas dahje -dronnet luohká, masa besse buohkat geat leat gaskkal 13 ja 100 jagi boarrásat, searvat.

Juohke vahkus leat juohkán Luossagonagas dahje -dronnet gaibagahpira sutnje guhte dan vahkkus lea goddán losimus luosa.

 

Nubbi luohkká, man gohčodeimmet «Guollelihkku» lei ges mánáid várás. Dasa besse mánát geat leat gaskkal 2 ja 12 jagi boarrásat, searvat vaikke makkár guliin mii sáhtii leat goddon vaikke gos.

Das vahkkosaččat vuorbádeimmet vuoiti, guhte faskii oaggunstákku.

 

– Dolgevuoggastákku dieđusge

Goappašat luohkáin dattege ledje maiddái stuorát vuoittut, son guhte losimus luosa gottii olles gilvoáigodagas vuoitá 3000 ruvdnosaš skeaŋkakoartta.

Ja dán geasi loahpalaš Luossagonagassan gárttai ge Magne Ballovara, guhte searvvai gilvui 19,1 kilosaš luosain, man lei goddán Geavgŋás, Deanus.

Son faske 3000 ruvdnosaš skeaŋkakoartta man Sport1 gávpi Kárášjogas lea sponsen.

– In lean vuordán vuoitit, muhto somá go meinnestuvvá muhtomin, lohká ieš Luossagonagas.

 

Go Ávvir jearrá maid áigu oastit skeaŋkakoartta ovddas, de su lea čielga vástádus:

– Gávppašan dolgevuoggastákku dieđusge.

(Ášši joatká gova vuolábealde)


19,1 KILOSAŠ: Magne Ballovara dat šattai loahpalaš luossagonagassan, ja faskii 3000 ruvdnosaš skeaŋkakoartta.
Priváhtagovva

Stuorra hávggain vuittii 1000 ruvdnosaš skeaŋkakoartta

Mánáidgilvvu loahpalaš vuoiti lea ges Iver Máhtte Buljo guhte spinnármállet vuokkain gottii čieža kilosaš hávgga Guovdageainnu eanus.

Son faske ges 1000 ruvdnosaš skeaŋkakoartta man Kárášjoga Sport 1 gávpi lea sponsen.

(Ášši joatká gova vuolábealde)


7 KILOSAŠ: Iver Máhtte Buljo ges searvvai mánáid oaggungilvui dáinna 7 kilosaš hávggain, son gottiige losimus guoli ja faske 1000 ruvdnosaš skeaŋkakoartta.
Priváhtagovva

Guollelihkku ja vuoitolihkku

Dasa lassin lei mis vel liigevuoitu, oaggunstággu ja -veasku mas lea 800 ruvnno árvu ja man Kárášjoga Sport1 gávpi lea sponsen. Dán vuoittu vuorbádat buohkaid gaskkas geat leat searvan gilvui, sihke mánáid ja ollesolbmuid gaskkas.

Dan vuittiiga Åge ja Knut Erik Solbakken, geat searvvaiga ollesolbmuid gilvui 6,2 kilosaš luosain.

Dien vahkkus go soai searvvaiga, de vuittiiga maiddái Luossagonagas gaibagahpiriid go lei losimus luossa dalle. Sudnos dat gal orro sihke guolle- ja vuoitolihkku.

Oktiibuot serve olbmot 18 guliin min oaggungilvui, ja mii giitit buohkaid geat serve ja sávvat lihkku vuitiide!


VUOITOLIHKKU: Árabus dán gease vuittiiga Åge ja Knut Erik Solbakken luossagonagas gahpiriid, ja dál vuittiiga ges oaggunstákku ja -veaskku mas árvu lea 800 ruvnno, man Sport1 gávpi Kárášjogas lea sponsen.

Govven: Astrid Helander

 

-Almmuhus-