-Almmuhus-
Featured box1Oaggun­gilvu dán jagi maid

Oaggun­gilvu dán jagi maid

-

-

Ávvir lágida dán geasi maid oaggungilvvu mánáide. – Ovddit gesiid lea oaggungilvu leamašan hui bivnnut ja mii háliidit dán geasi maid joatkit dainna, lohká Ávvira geassebargi Biret Helene Eira.

– Mannan geasi mun vásihin ahte mánát ledje hui áŋgirat oaggut ja sáddet oaggungovaid midjiide. Lei hui suohtas oaidnit govaid buot dain áŋgiris guollebivdiin ja danne mii háliidit dán geasi maid lágidit oaggungilvvu mánáide, lohká Ávvira geassebargi Biret Helene Eira.

Skeaŋka buohkaide

Geassebargi muitala ahte juohke vahkku vuorbádit ovtta vuoiti sin gaskkas geat dan vahkku leat sádden guollegovaid Ávvirii. Son vuoitá oaggunstávrrá.

– Nu go diibmá ge, de háliidit mii dán jagi maid sáddet unna skeaŋkkaža juohke mánnái gii sádde oaggungova, muitala Biret Helene.

Álkes njuolggadusat

Gilvvus leat moadde álkes njuolggadusa:

Gilvu álgá geassemánu 26. beaivvi ja bistá borgemánu 16. beaivvi diibmu 24.00 rádjái. Gilvui sáhttá searvat vaikko makkár guliin, beare lea goddon oaggunstávrráin. Guolli oažžu leat goddon vaikko gos, muhto ferte leat goddon 2020 geasi.

Guolle- dahje oaggungova sáddet avvir.no siidui. Doppe deavddát maid buot dieđuid guoli ja oaggu birra.

Buohkat mielde vuorbádeamis

Loahpas geasi leat maid buohkat geat oassálastet mielde vuorbádeamis mas sáhttá vuoitit 1500 ruvnno árvosaš skeaŋkakoartta.

– Mun sávan ahte mánát dán geasi maid sáddejit guollegovaid midjiide go leat goddán guliid. Soaitá vel nu lihkku ahte vuoitá ođđa oaggunstávrrá mainna de beassá geahččalit oaggut, lohká Biret Helene Eira.

-Almmuhus-