Eai buohkat beroš ráfáidahttináiggis. Beaiveguovdil leigga dát guokte guolásteaddji lobiheamet bivdime Deanus.
Eai buohkat beroš ráfáidahttináiggis. Beaiveguovdil leigga dát guokte guolásteaddji lobiheamet bivdime Deanus.
Odne sullii diibmu 12 bisánii kárášjohkalaš Daniel Eikjok geaidnogurrii Horpmá bajábealde Deanuleagis. Son fuomášii guoktása johkagáttis ja ohcalii giikana geahččat maid soai bargaba. De fuomáša ahte leaba oaggume.
– Goappašagain lei stággu. Soai oidnuiga goddime guoli ja govvideigga hirbmosit dan guoli. In oaidnán gal nu sihkkarit makkár guolli lei, muitala Eikjok.
Son lohká oaidnán ahte lei Suoma campingbiila das gokko dát guovttos leigga oaggume.
Deanučázádagas ii leat lohpi bivdit sotnabeaivvis diibmu 18 gitta mánnodahkii dibmu 18.
Ohcala johkafávtta
Eikjok lea hirpmástuvvan go olbmot bállejit ná lobihuššat beaiveguovdilin. Son jearrá ii go luossahálddahusas doaimma johkagozihandoaibma.
– Eai oro gal doarvái bures fákteme joga dán guovllus. Ii dát leat veháge vuogas, go lea ollu sáhka juo das movt suopmelaččat oggot juohke sajes. Dát han čájeha ahte sii ožžot láhttet movt ieža háliidit. Árvidan maid ahte jus sudnos livččii oaggunkoarta, de livčče maid diehtán goas lea lohpi oaggut ja goas ii. Danne balan ahte eai leat bassan oaggunrusttegiid ge nu movt galgá, árvvoštallá son.
Ovttatmanos iskat
Deanučázadaga guolástanhálddahusas duođaštit ahte lea ráfijánddur sotnabeaivvi diibmu 18 gitta mánnodahkii diibmu 18, ja nu lea miehtá geasi.
Direktora Hans-Erik Varsi ii loga diehtán maidege dán lobihis guollebivdiid birra, ja áigu ovttatmano bidjat olbmuid iskat dán báikki.
– Eai johkavávttat leat birra jándora joga nalde, muhto mis leat juohke vahkus olbmot joga nalde, sihke oalgejogain ja váldočázádagas. Ii leat dieđus juste diekko johtán dat fákta, čilge son.
Sáhkkohallet jus váidá
Varsi ii loga iežaset vásihan ahte olbmot eai doahttal ráfáiduhttináiggi, vaikko dát olgoriikkalaččat leaba dál bivdán lobiheamet.
– Ii min mielas gal oro nu stuora váttisvuohta. Dás sáhttá dieđusge leat diehtemeahttunvuohta, go ii leat buot jogain dákkár ráfijánddur. Sáhttet muhtin johtaleaddjit soaittáhagas bivdán, geat muđui eai bivdde dán joga. Dat gal sáhttá dáhpáhuvvat, go lea guhkki dát čázádat. Muhto ii leat dieđusge dohkálaš, ja jus mii fuomášat, de váidit ja de sáhkkohallá, dadjá Varsi.
Hálddahusa olbmot eai gávdnan ovttage oaggume dán guovllus, muhto Varsi lohká son lea duhtavaš go olbmot cavgilit lobihis bivddu birra.
