-Almmuhus-
-Almmuhus-
OĐĐASAT Oaččui vuodjingildosa

Oaččui vuodjingildosa

-

-

Stáhta geaidnodoaimmahat dárkkistii mannan vahkus mohtorfievrruid Nuorta-Finnmárkkus buoridan dihtii buot johtoleddjiid johtolatsihkarvuođa. Earret eará oaččui okta lossa biila vuodjingildosa go biilla ovdaklásas ledje áđat mat hehttejedje oaidnima.

Stáhta geaidnodoaimmahaga (SG) ossodaga gulahallanolmmoš Tor Steinar Wikan, muitala preassadieđáhusa  bokte ahte Stáhta geaidnodoaimmahat dárkkistii geahppa ja lossa mohtorfievrruid 26. vahkus.  

– Buohkat ledje molson geasserieggáide, mii lea buorre. Deanuleagis bisseheimmet ovtta gálvobiila oktan vovnnain mas lei guorbmi. Dás fuomášeimmet at fievrredeaddji lei geahččalan alcces láigohit guorbmafievrridanlobi, muhto lohpi ii lean lobálaš ja fitnodat lei heaittihuvvon. Biilavuoddji oaččui vuodjingildosa ja fertii iežas guorpmi sirdit nuppi fivrrui. Fitnodat váidojuvvui, muitala Tor Steinar Wikan Stáhta geaidnodoaimmahagas. 

Stáhta geaidnodoaimmahat dárkkistii biilaboagángeavaheami 45 lossa biillas ja 20 geahppa biillas Deanus, Idjavuonas, Báhcavuonas ja Bearalvágis. Vihtta biilla ožžo vuodjingildosa/manahedje biillaregisttargalbba. Okta váidui ja vihtta ožžo čálalaš dieđu ahte buot ii leat ortnegis fievrrus. 

Vuodjingildosat ledje: váillui vuoddjiduođaštus, áđat ovdaklásas mat hehttejit oaidnima, mohtora dássenjuvllas amas áhta, goallosjorris váillui čuovga ja váilevaš guorbmemearkun. Viđas ožžo teknihkalaš lihpu ahte buot ii leat ortnegis. Bargobearráigeahčču oaččui raportta go vinta ii lean dohkkehuvvon. Okta sáhkkohalai go váillui vuodjinkoarta. 

- Advertisement -
-Almmuhus-