Finnmárkku politiijain lea leamaš olu bargu mannan ija.
Finnmárkku politiijain lea leamaš olu bargu mannan ija.
Gaskaijaáigge bissehedje Álttá politiijat muhtin 20-jahkásaš dievddu. Almmái áššáiduhtto go navdo gárrenoaivvis vuodján biillain.
Gužžet almmolašbáikkiin
Váile golmma áigge ihkku dieđihedje ges Hammerfeastta politiijat ahte muhtin njealjátlotjahkásaš almmái goččai guovdu gávpoga. Almmái váidui.
Diibmobeale maŋŋil gávnnahalai ges muhtin eará njealjátlotjahkásaš almmái go lei gožžamin gávpotguovddážis, maiddái dát váidui.
Šadde ruoktot doalvut
Diibmu 04.00 mannan ija šadde Girkonjárgga politiijat doalvut muhtin albmá ruoktot.
– Almmái lei badjelmeare gárremin, čállet Nuorta-Finnmárkku politiijaguovlu iežaset twittera bokte.
Viđa áigge iđđes ges šattai Álttá Thon Hotealla guokte juhkan guossi bidjat olggos hoteallas. Politiijat fitne báikkis ja dáhtto olbmoguoktá jaskkodit ja mannat nohkkat.
Láhpii čoavdagiid
Beal guđa áigge iđđes šadde fas Álttá politiijat johtui. De šadde geas veahkehit muhtin nissona guhte lei heađis go lei láhppán stohpočoavdagiid go galggai olgouvssa rahpat.
– Čoavdagat álot ravget man nu gaskii, čállet politiijat twittera bokte.
Váile guđaš šadde Álttá politiijat fitnat vel jaskkodahttimin feastta muhtin priváhtadálus Aronjárggas. Buot dáid leat sihke Nuorta- ja Oarje-Finnmárkku politiijaguovllut dieđihan twittera bokte.
