-Almmuhus-
OĐĐASATOaččui filbmabálkkašumi mannan vahkkoloahpa

Oaččui filbmabálkkašumi mannan vahkkoloahpa

-

-

Dokumeantafilbmadahkki Katja Gauriloff oaččui dán jagaš Skábmagovat-bálkkašumi. Sámi dáidaga doarjjasearvi čalmmustahttá Gauriloff barggu ja čehppodaga.

Katja Gauriloff bargu ja filmmat čájehit ahte son váldá filmmaid dahkama duođas. Son lea filbmabagadalli, muhto maid filbmabuvttadanfitnodaga Oktobera oasseoamasteaddji, man bokte su filmmat leat ráhkaduvvon ja vuvdojuvvon ovddos guvlui. Sámis eai leat go moadde filbmadahkki, geat iežaset organisašuvnnaid bokte buvttadit filmmaideaset, čállá Skábmagovat festivála preassadieđáhusas.

 

Dán jagáš nuortalaš

Nuortasámiid giela ja kultuvrra searvi Saa´mi Nue´tt ja Nuortalaččaid giličoahkkin válljejedje mannan čavčča Katja Gauriloff jagi nuortalažžan.
Gauriloff filbma Mannu mie’cc Kai’ssi lea buktán ođđa fámuid nuortalaš servošii ja ovttastan álbmoga.
Nuortalaš searvvuš lea leamaš rámis das, ahte Katja Gauriloff lea filmmainis buktán oidnosii Kaisa Taisia Gauriloff ja Robert Crottet earenoamáš oktavuođa ja dán ustitvuođa mearkkašumi nuortalaš álbmogii.  

 

Vuosttaš sámi filbma Jussi-bálkkašupmái

Katja Gauriloff dokumeantafilmmat Huuto tuuleen, Säilöttyjä unelmia ja Mannu mie’cc Kai’ssi leat bálkkašuvvon Suomas ja máilmmiviidosaččat.
Dát filmmat leat maid bures čohkken olbmuid festiválaide ja ealligovvateáhteriidda.
Maŋimus ánsun lea dat Katja Gauriloff Mannu mie’cc Kai’ssi  lea Jussi-bálkkašupmi evttohassan guovtti kategoriijas: jietnaplánemis ja dokumeantafilmmain.
Dát lea vuosttas geardi go sámi filbma lea Suomas Jussi-bálkkašupmi evttohassan. Jussi lea Suoma jagis 1944 álggahuvvon filbmasuorggi bálkkašupmi, man filbmadahkkit atnet árvvus.

 

Ovddit jagiid vuoitit

Skábmagovat-bálkkašumiid leat dán ovdal mieđihuvvon Johs. Kalvemoi, Nils Gaupii, Sverre Porsangerii, Liisa Holmbergii, Oula Näkkäläjärvii ja Inger-Mari Aikioi.  Dán jagáš Skábmagovat-bálkkašupmi geivejuvvui Katja Gauriloffii lávvardaga Sajosis seamma oktavuođas go su filbma čájehuvvui Skábmagovat publikummii.

-Almmuhus-