Goroso festivála loahpaheamis oaččui nuorra nisu dollarusona čalbmái. Muđui dieđihit politiijat ahte leamaš olu bargu riemuid oktavuođas.
Badjel 20-jahkásaš nisu dolvojuvvui doaktára lusa go roasmmehuhtii čalmmi Goroso festiválas Ráissas.
Son galgá leat ožžon dollarusona čalbmái go loahpahedje festivála bážaniiguin sotnabeaivvi čuovganeapmái.
– Sus lea čalbmi roasmmehuvvan, muhto mii eat dieđe man bahuid. Dáhpáhus deaividii go loahpahedje festivála bážaniiguin, dadjá Romssa politiijaguovllu operašuvdnajođiheaddji Beate Helberg NTB ođasdoaimmahahkii.
Politiijat leat dutkagoahtán ášši.
Doarvái bargu
Goroso festivála lágiduvvui vuosttaš gearddi ja čohkkii birrasii 3000 festiválagussiid sihke bearjadaga ja lávvardaga.
Politiijain ledje čieža bálvá festiválas.
– Festiválas lei garra feasta ja lávvardateahkeda ja sotnabeaivvi čuovganeapmái ledje olu guossit badjelmeare gárremin. Politiijabálvváin leamaš eanet go doarvái bargu, dadjá Helberg.
Nannet váktabálvalusa
Romssa politiijaguovlu dieđiha maid ahte šadde bivdit lágideddjiid nannet váktabálvalusa festiválas.
– Goroso festiválas leat oallugat badjelmeare juhkan ja báikkis lea olu skihkahisvuohta. Moadde dievddu leat bidjon eret festivalabáikkis ja máŋggas leat gártan dearvvašvuođabálvalusa háldui go leat menddo juhkan. Mii ávžžuhit lágideddjiid skáhput eanet vávttaid, čállet Twitteris.
