Sámediggi juolluda doarjaga ávvugirjái Beaivvážii ja konsertii Plassjes Marja Mortensson ja KORK bokte.
Sámi nášunálateáhteris Beaivvážis lea 40 jagi ávvudeapmi 2021:s ja dan oktavuođas áigot almmuhit govvadokumentáralaš girjji, čállá Sámediggi preassadieđáhusas. Sámediggeráđđi juolluda 200 000 ruvnno bargui dainna girjjiin.
Viidáset čállá Sámediggi ahte Beaivvážis lea gelddolaš ja deaŧalaš historjá sámi kultuvrralaš eaktobiddjin. Ollu lea dáhpáhuvvan dan rájes go teáhter ásahuvvui fargga 40 jagi dás ovdal, friijajoavkun dramáhtalaš dáhpáhusaid oktavuođas Áltá-Guovdageainnu-eanu dulvadeami oktavuođas, ja dássážii go lea šaddan ámmátlaš teáhterásahussan mii johtá máŋgii jagis miehtá Sámi. Sámi giela ja kultuvrra gaskkusteaddjin lea Beaivvážis buhttekeahtes árvu.
– Sámedikki mielas lea ávvugirji deaŧalaš servodahkii, ja go sámi nationála teáhtera historjá buktojuvvo olámuddui, dadjá sámediggeráđđi Henrik Olsen preassadieđáhusas.
Raasten Rastah
Máttasámi festivála Raasten Rastah oktavuođas galgá lágiduvvot konsearta Marja Mortenssonain ja Sáddehatorkesteriin (KORK) Plassje girkus čakčamánu 25. beaivvi dán jagi. Sámediggeráđđi juolluda 179 000 ruvnno Raasten Rastah festiválii dása, dieđiha Sámediggi preassadieđáhusas.
