Sámediggi vuosttilda huksemiid boazodoalluguovlluide.
Gáŋgaviika ja Davvisiidda gielddat leat bivdán Norgga čázádat- ja energiijadirektoráhta (NVE) gieđahallat Davvi prošeavtta Lágesvuonas, Rovroráššas ja Johkangeažis, mat leat Čorgaš guovllus Finnmárkkus. Dan čállá Europower.
NVE ossodathoavda, Svein Grotli Skogen dadjá ahte sii atnet vuostehágu bieggafápmui duođalažžan. Árrat geassemánus lei NVE:s čoahkkin dáid prošeavttaid birra earret eará Stáhtahálddašeddjiin, Romssa ja Finnmárkku fylkkasuohkanin ja Sámedikkin.
– Mii fertet várrogasat bargat, čohkket dieđuid ja guldalit buot beliid. Seammás fertet jođánit bargat proseassain. Ii oktage dine das jus eaŋkiláššit ádjánit, dadjá Skogen.
Sámedikkis lea vuosteháhku
Sámediggeráđđeláhtu, Hans Ole Eira, deattuha ahte Sámediggi čielgasit vuosttilda bieggafápmohuksema boazodoalloguovlluin.
– Boazodoallu galgá fátmmostuvvot vuosttaš beaivvi rájes ja olles proseassa čađa. Ferte fuolahit ahte buktá unnimus lági mielde hehttehusaid boazodollui ja earáide geat geavahit guovlluid lustadoibmii dahje resursaávkkástallamii. Muhtin guovllut leat maid bassiguovllut, dadjá Eira ja lasiha:
– Dasa lassin lea dehálaš fátmmastit sin geain lea obbalaš sámi árbevierromáhttu.
(©NTB)
