Oahppolihtu guokte iskkadeami mánáidgárddiid bargoáiggi birra, duođaštit ahte mánáidgárddiin lea menddo unna bargoveahka ja olu buozalmasvuohta, ja dat váikkuha mánáidgárddiid kvalitehtii.
Diibmá iskkai Oahppolihttu (Utdanningsforbundet) mánáidgárddiid bargoáiggi KS-guovllus. Dál lea mánáidgárdde raporta almmuhuvvon tariffaguovllus PBL (Priváhta mánáidgárddiid riikalihtus) ja Oslo gielddas, čállá Oahppolihttu preassadieđáhusas.
Oktiibuot čájehit dat hui čáhppes gova mánáidgárddi bargoveaga ja mánáid dili birra. Raporttat muitalit ahte eai leat galle mánáidgárdeoahpaheaddji geat ožžot dili plánemii. Sivva dasa lea unna bargoveahka ja olu buozalmasvuohta. Áigi sihkkarastit buori pedagogalaš sisdoalu mánáidgárddis manná eará dárbbašlaš bargguide.
Mánáidgárdeoahpaheaddjit fertejit juohke beaivi guhkit bargat go dan maid galggašedje, go eai sáhte mánáid guođđit okto go leat menddo unnán bargit ásahusas. Liigebarggu ovddas ožžot hárve bálkká dahje friija. Dat čuohcá eaŋkilmánáid čuovvoleapmái ja pedagogalaš doibmii.
– Mánáidgárdeoahpaheaddjit barget eambbo go dárbbašit vai min mánát ožžot buot buoremus vuolggasaji eallimii. Sis lea alla oahppu ja buoremus oahppu mo mánát čálget ja ohppet, lohká Oahppolihtu jođiheaddji Geir Røsvoll ja lasiha:
– Sis lea nu heajos bargodilli ahte eai beasa barggu albma láhkai bargat, eai ge oaččo mávssu liigebarggu ovddas. Dat ii leat oppanassiige dohkálaš.
Buot pedagogalaš doaimmaid, plánemiid ja árvvoštallamiid, mánáid čuovvolemiid, váhnenságastallamiid ja nu ain ii leat vejolaš čađahit jus ii nuvttá bargga ja friijaáiggis. Árgabeaivvit mannet ceavzimii ja áimmahuššat ahte mánát eai roasmmehuva, lohká muhtin bargi raporttas.
Røsvoll lohká raporttaid čájehit ahte dat dáhpáhuvvá miehtá Norgga, iige dušše muhtin guovlluin.
