Dán lohkkiidreivves čálliba Árjja Nuortaguovllu ja Davviguovllu vuosttaševttohas iežaska jurdagiid Nussira birra.
Árja oaivvilda ahte Nussirprošeakta ii sáhte čađahuvvot plánaid mielde. Norga, Papa New Guineain ovttas, lea áidna riika máilmmis mii ain suovvá ruvkefitnodagaid bázahusaid bálkestit merrii.
Mearradutkaninstituhtta lohká ahte Nussira bázahusluoitin boahtá vearráhin váikkuhit Riehpovuona mearraeallimii. Mearradutkaninstituhtta maid čujuha konkrehtalaš meattáhusaid Nussira bázahusluoitima lohpeohcamis, earet eará Riehpovuona čikŋodaga dieđuin. Bázahusbálkesteapmi boahtá váikkuhit buot eallima Riehpovuonas, ja maiddái guollebivdiid.
Protect Sápmi leat sin raporttas dárkilit duođaštan ahte Nussirprošeavttas bohtet maid issoras čuovvumušat Fieddara ja Fálá orohagaide. Boazodoallu han lea ealáhus mii lea dahkkon guoddevaš lágis máŋga čuohtejagi, ja mis buohkain boahtá leat ávkin Fieddara ja Fálá ealáhusas guhkes áiggi dássái maid. Sii leat bearrašat ja eaŋkilolbmot geat ellet boazodoalus, ja sidjiide gártá issoras noađđin ahte bargosadji ja eallinvuohki soaitá jávkat, oasážiid oasážiid mielde. Árjja mielas lea deháleamos ahte dáid bearrašiid vuoigatvuođat seailluhuvvojit.
Sámi luondduávkkástallan
Dat mii leamašan dehálaš mearrasámiide áiggiid čađa, lea ahte heivehit luondduávkkástallama luonddu dili ja riggodagaid ektui.
Gávcci jahkodagain leat máŋggalágan riggodagat luonddu ávkkástallamii, ja mis leamašan álohii jurdda ahte dát riggodagat galget seailluhuvvot boahttevaš buolvvaide seamma buorre dahje buoret dilis go mii dál lea. Danin leat gitta min áigái leamašan rikkis luossanálit, eará sáivačáhceguollenálit, boazodoallu, rievssat, dorski ja eará mearrašlájat main olbmot leat sáhttán eallit.
Vuoigatvuođaid čielggadeapmi
Árja oaivvilda ahte dálá mearrádusvuogádat luonddugáržžidemiid ektui lea dohkketmeahttun. Sámi oaivilat eai vuhtii váldo, ja mii vásihit ahte boazodoallu, mearrabivdin, meahcceávkkástallit ja lotnolasealáhusat badjelgehččojit measta buot áššiin main lea sáhka luonddugáržžideamis. Minoritehtaid beroštumit ja oaivilat eai vuhtii váldo dohkálaš vuogis, já gáržžidanlobit mat addojit vásihuvvot dego rihkkumat eamiálbmogiid vuoigatvuođaide.
Dálá vuogádat, mas gáržžideaddjis ieš lea ovddasvástádus ahte ovdanbuktit konsekveansaguorahallama dahká ahte politihkkáriid diehtovuođđu oidu huksedeaddjiid. Maŋimuš áiggiid dávisteamit ja proteasttat gáržžidemiid vuostá sámi álbmogis ja luondduberošteddjiin čájeha ahte dálá vuogádat ferte rievdat. Árja háliida ahte dálá mearrádusvuogádat galgá rievdat, nu ahte minoritehtaid oaivilat bohtet buoret ovdan mearridanproseassain.
Ole Nils Ailo Siri, Árja 1. evttohus Davveguovllu válgabiirres
