Fiettar orohaga jođiheaddji Per Johnny Aslaksen Skum oaivvilda doaibmalobi maid Nussir ASA dán vahkku oaččui lobiheapmin.
Dán vahkku beakkehii ahte Ealáhus- ja guolástusdepartemeanta lea dál addán doaibmalobi Nussir ASA:i roggat veaikki Riehpovuonas.
Fiettar orohaga jođiheaddji, Per Johnny A. Skum lohká ahte mearrádus ásahit veaikeruvkke Nussirii ja Gumpenjunnái lea stuora katastrofan Rášša-siidii ja Fiettar orohahkii.
Orohatjođiheaddji oaivvilda ge mearrádusa njulgestaga lobiheapmin.´
– Ráđđehus lea oalát beahttán boazodoalu, ja mearrádus čájeha ahte Norgga stáda oalát hilgu boazodoalu eanangeavahanvuoigatvuođaid dán guovllus, dadjá Skum preassadieđáhusas.
– Ii vejolaš čađahit heivehandoaimmaid
Ealáhus- ja guolástusdepartemeanta árvvoštallá ahte ruvkedoaibma váikkuha boazodollui, muhto sáhttá čađahuvvot heivehemiin vai váikkuha unnimus lági mielde boazodollui.
Dása ii leat orohatovdaolmmoš ovttaoaivilis.
Skum deattuha ahte Fiettar orohat lea álggu rájes juo vuosttaldan Nussir ASA plánaid álggahit veaikeruvkke.
– Heivehandoaimmaid mat leat vuođđun mearrádussii ii leat vejolaš čađahit. Dán leat mii deattuhan ráđđádallamiiguin Ealáhus- ja guolástusdepartemeanttain, lohká Skum ja čilge viidáseappot:
– Váikkuhusguorahallamat mat mearrádusa vuođđun leat, eai leat ollislaččat, go dain earret eará eai leat árvvoštallan makkár ekonomalaš ja dearvvašvuođalaš váikkuhusat dás sáhttet boazodollui. Min birgejupmái leat maid Riehponjoga luosat ja vuona guolit dehálaččat.
– Dárbbašit eatnamiid, eat ge ruđa
Fiettar-orohaga jođiheaddji deattuha ge ahte jus sii galget sáhttit doaimmahit ceavzilis boazodoalu, de dárbbašit sii guottetbáikki ja guohtuneatnamiid, eai ge ruđalaš buhtadusaid.
– Váikkuhusat go massit guottetbáikkiid lea ahte máŋggas mis šaddet heaitit boazodoalus. Dát lea njulgestaga veahkaváldi guovllu boazodoalu vuostá ja daid bearrašiid vuostá geaidda dát čuohcá, oaivvilda Per Johnny A. Skum.
Fiettar orohaga ovdaolmmoš fuomášuhttá maid ahte Nussir ruvkii ii leat áidna sisabahkken mii lea áittán guovllu boazodollui:
– Statnett lea huksemin sin «monster-linjjá», 420 fápmolinjjá, mii manná orohaga nuorttabealhága bokte, guokte ođđa čáhcefápmorusttega leat huksejuvvome, bartaguovllut, Norgga čázadat- ja energiijadirektoráhtas (NVE) lea bierggufápmohuksenplánat ja dál vel buot dáid ala boahtá doaibmalohpi Nussir ASA veaikeruvkii.
– Dagahan siskkáldas riidduid
Per Johnny Skum lohká ahte das go guovllu boazodoallu maŋemus jagiid lea manahan guohtuneatnamiid lea maid dagahan siskkáldas riidduid guovllu boazodolliid gaskkii. Sisabahkkemiid geažil manahit guohtuneatnamiid ja dan geažil leat fas ferten boazologu unnidit.
– Buot boazoeaiggádat háliidit buriid guohtumiid bohccuideaset, go boazu han lea dat deháleamos mii mis lea, lohká Skum.
Orohatovdaolmmoš čilge ahte dát go čađat gaskka vásihit sisabahkkemiid čuohcá olbmuide:
– Olu boazoeaiggádat leat váiban eallit dakkár dilis gos čađat gaskka vásihit ahte ii dušše sin birgejupmi lea áitojuvvon, muhto obanassii sin eksisteansa. Mii eallit baluin ahte veaikeruvkke nuoskkideamit sáhttet vaháguhttet sihke bohccuid, min mánáid ja min iežamet.
– Dát šaddá 2000-logu Álttá-áššin!
Fiettar orohaga ovdaolmmoš vároha ahte dát ášši sáhttá šaddat 2000-logu Álttá-áššin. Son oaidná ahte sii leat oallugat giehtalaga geat vuosttaldit Nussir ruvkeplánaid.
– Dán áššis mii vuosttaldit bálddalagaid mearrasápmelaččaiguin, báikkálaš olbmuguin, guolásteddjiiguin ja muđui norgalaččaiguin geat oaivvildit ahte Riehpovuotna, Riehponjoga ja Norgga luonddu galget buolvvat min maŋis eaiggáduššat, eai ge olgoriika ruvkefitnodagat mat leat oanehis ja jođánis dietnasa maŋis, dadjá Fiettar orohaga ovdaolmmoš, Per Johnny A. Skum.
Árvvoštallet ahte ii hehtte iige gáržžit
Ealáhusministtar Torbjørn Røe Isaksen celkkii árabut dán vahkku ahte sii leat ráđđádallan sihke boazodoaluin ja Sámedikkiin, muhto Sámedikkiin sii eai leat ovttaoaivilvuhtii boahtán.
Ealáhus- ja guolástusdepartemeanta mieđiha ahte ruvkedoaibma váikkuha boazodollui.
Dattetge oaivvildit ahte ruvkedoaimma sáhttá heivehit nu ahte dat váikkuha unnimus lági mielde.
Ovdamearkka dihte ahte ii galgga doaibma lea guottetáigge.
– Departemeanta árvvoštallá ahte doaibma ii hehtte dahje gáržžit boazodoallodoaimmaid dahje sámi kulturdoaimmaid, lohká ealáhus- ja guolástusministtar Torbjørn Røe Isaksen.
