Nuorttanaste bláđis leat leamaš 12 siiddu 2003 rájes ja dál, ođđajagemánus, ilmmai vuosttaš 16 siidosaš nummar.
Nuorttanaste bláđis leat leamaš 12 siiddu 2003 rájes ja dál, ođđajagemánus, ilmmai vuosttaš 16 siidosaš nummar.
Bláđđi ilbmá oktii mánus ja áigumuš lea ráhkadit buot dán jagi nummariid 16 siidosažžan.
Doaimmaheaddji illuda ovdáneami geažil maid Sámediggi addá, go ruđalaččat doarju Nuorttanastte.
– Sámedikki haga livččii váttes dilli min uhca bláđážis, lohká doaimmaheaddji Ann Solveig Nystad preassadieđáhusas.
120 jagi ávvudeapmi
Nuorttanasttes lei diibmá 120 jagiávvudeapmi ja dán oktavuođas lea Nuorttanaste buoridan ja ođasmahttán bláđi lohkkiid miela mielde.
Nuorttanastte beaivválaš jođiheaddji, Ammon Piera Nystad, muitala preassadieđáhusas ahte sii leat maid ráhkadan unna filmmaža Nuorttanastte historjjá birra vai lohkkit ja earát ožžot unna govaža man rikkis dát historjá lea.
– Dan gávdná Nuorttanastte Facebook-siiddus, muitala Nystad.
Hálbbidan bláđi
Haddi maiddái vuoliduvvui 100 ruvnnuin, ja dál máksá dušše 200 ruvnnu jahkái doallat Nuorttanastte.
Beaivválaš jođiheaddji Ammon Piera Nystad lea rámis Nuorttanasttiin.
– Bláđđi lea ceavzán guokte máilmmisoađi, geafivuođa ja garra dáruiduhttima. Bláđđi lea leamaš várjalussan ja jeđđehussan sámiide go dáruiduhttin ja eará lossa áššit vašuhedje servodaga. Doaivumis lea Nuorttanaste oidnosis ja várjaluvvo sámi servodagas dálá áiggis, nu go Nuorttanaste lea várjalan sámegiela ja kultuvrra 120 jagi čada. Nuorttanaste giitá doarjaga ovddas, dadjá Nuorttanastte beaivválaš jođiheaddji Ammon Piera Nystad loahpas preassadieđáhusas.
