Buollin ja gárrenolbmot, Finnmárkku politiijain lei veahá bargu mannan ija.
Buollin ja gárrenolbmot, Finnmárkku politiijain lei veahá bargu mannan ija.
Sihke nuorttabeale ja oarjjabeale ossodagat Finnmárkku politiijaguovllus leat šaddan veaháš bargat mannan ija.
Bulii gutnan
Finnmárkku politiijaguovllu nuorttabeale ossodat dieđihii diibmu 00.09 mannan ija ahte muhtin stohpu Juovlavuonas lei buollimin.
Buot heahteetáhtat ledje báikkis.
Diimmu maŋŋil dieđihedje politiijat ahte eai nagodan gádjut stobu.
– Stohpu lea buollán gutnan. Kránnjástobut sihkkarastojit go guovllus lea garra biegga, čállet politiijat twitteris.
Diibmu 02.43 dieđihedje ges ahte muhtin njealjátlot-jahkásaš nisu Álttás gohččojuvvui guođđit gávpotguovddáža go lei menddo gárremin.
Maiddái Hammerfeastta politiijat šadde gárrenolbmuid hálddašit mannan ija.
Diibmu 02.45 fitne sii ges muhtin stobus Rypefjordas gos lei feasta.
– Politiijat gohččo feastaeaiggáda jaskkodit, čállet politiijat.
Diibmu 03.21 dieđihedje Hammerfeastta politiijat ges ahte ledje ožžon cavgileame ahte muhtin lea gárrenoaivvis vuodján.
– Mii leat ohcamin biilavuoddji, čállet politiijat.
Nohkkan skálvái
Álttá politiijat ges fuomášedje badjelmeare gárremin olbmo guhte lei ribahan skálvái nohkkat gávpotguovddážis.
Dán birra dieđihedje diibmu 03.44
Diibmu 06.23 ges fitne Álttá politiijat muhtin priváhtadálus jaskkodahttimin feastta.
Dakka maŋŋil, diibmu 06.24 dieđihedje ges ahte leat šaddan muhtin albmá váldit gitta Leavnnjas, go lea rieja ráhkadan.
– Mii ásahat ášši dás, čállet politiijat.
– Biddjon goikat
Diibmu 06.56 sotnabeaiiđit, dieđihedje ges ahte Girkonjárgga politiijat leat šaddan váldit muhtin olbmo butkái.
– Badjelmeare gárremin olmmoš lea arrestii biddjon «goikat», čállet politiijat.
