Logi nuoras jáhkket guđas šaddat iežaset barggu haga oktii eallimis, čájeha ođđa iskkadallan.
Gaskavahku almmuhuvvo Ungdata-iskkadallan mas 100 000 oahppi nuoraidskuvllain ja joatkkaskuvllain leat vástidan gažaldagaid skuvlla-, dearvvašvuođa- ja boahtteáiggi birra.
Ii leat buorre doaivva
Dán jagáš raporttas boahtá ovdan ahte nuoraid gaskkas lassána lohku geat eai jáhke beassat bargui go gerget skuvllas, čállá Klassekampen.
2013:s vástidedje 44,8 proseantta nuoraidskuvlaohppiin ahte eai jáhke šaddat barggu haga bargoeallimis. 2016:s njiejai lohku 37,5 prosentii.
Nuorat čuvvot mielde
Nieiddat eai leat seamma sihkkarat movt boahtteáigi šaddá.
38 proseantta nieiddain eai jáhke goassege leat barggu haga. 36 proseantta bártniin dadjet dan seamma.
– Mii oaidnit čielga tendeansa máŋggaid jagiid badjel. Lea váttis diehtit mii sivva lea, muhto orro čájeheame ahte nuorat čuvvot mielde ja leat gullan ahte sáhttá šaddat hástalussan bargoeallimis boahtteáiggis, muitala Nova dutki ja raportta ovddasvástideaddji Anders Bakken. (©NTB)
