Golmmas juohke logi nuorra rávisolbmos lohket iežaset áigut heaitit borramis oamibierggu.
Measta juohke goalmmat olmmoš vuollel 30 jagi čuoččuha ahte áigu unnidit oamibiergoborrama dán jagi.
InFact lea Nationen ovddas jearran norgalaččain ahte áigot go sii borrat unnit oamibierggu 2023:s. Measta okta njealljásis, 23,6 %, vástidedje ahte áigot unnidit dan.
Sin gaskka geat leat 18–29 jahkásaččat vástidit 29,1 % ahte áigot unnidit oamibiergoborrama. Birrasiid 6 % dadjet ahte eai oba bora ge oamibierggu. Seammás vástidit measta guđas juohke logi olbmos, 58,9 % ahte áigot borrat ain seamma mađe go dál.
Henrik Nordtun Gjertsen, Norges Bygdeungdomslaga jođiheaddji, lea kritihkalaš vástádusaide ja fuomášuhttá ahte biergobuvttadeapmi lea guovllueanandoalu ja giliid geađgejuolgi miehtá riikka.
– Dákkár áiggi go lea globála biebmoeahpesihkarvuohta, de mii dárbbahit ahte buot riikkat ávkkástallet iežaset resurssain, ja oamibierggu lea álkimus buvttadit, dadjá son.
Gina Gylver, Luonddu ja nuoraid jođiheaddji, dadjá ahte son lea ilus go nu oallugat áigot unnidit biergoborrama.
– Dat lea buorre ahte lea nu, muhto livčče galgan vel eambbosat, dadjá Gylver preassadieđáhusas.
