-Almmuhus-
-Almmuhus-
OĐĐASATNuorra nisu duššai

Nuorra nisu duššai

-

-

Mannan sotnabeaivve duššai 29-jahkásaš nisson­olmmoš biilalihkohisvuođas Omasvuona suohkanis. Biila mainna nisu vujii beaškkehii oktii gálvobiillain.

Jápminlihkohisvuohta dáhpáhuvai E6:š geainnus Rássenjárggas olggobealde Ivguvuonbađa, Omas­vuona suohkanis sotna­beaivve badjelaš diibmu 17.00. 

– 29-jahkásaš nisu gii vujii persovdnabiillain duššai lihkohis­vuođas. Oapmahaččat leat ožžon dieđu jápmima birra, dieđihii Romssa politiijaguovlu sotna­beaivvi eahkeda. 

Gálvobiilavuoddji ii galgga leat roasmmehuvvan lihkohisvuođas, muhto dolvojuvvui doaktára lusa iskkadeapmái. 

 

Dutket lihkohisvuođa

Geaidnu lihkohisvuođabáikkis lei gitta máŋga diimmu dan botta go gádjunbarggut, čorgenbarggut ja dutkamat čađahuvvojedje. 

– Mii diehtit sullii mii lea dáhpáhuvvan, muhto dáid dieđuid eat dáhto vel almmuhit, dajai Romssa politiijaguovllu doaibmajođiheaddji Ingvild Furnes Nordlys aviisii sotnabeaivvi eahkeda. 

Ivgu leansmánnekantuvrra ­dutká ášši viidáset, muhto doppe ii leamaš vejolašvuohta oažžut kommentára ovdal go aviisa ­sáddejuvvui deaddileapmái. 

 

Goike geainnut 

Sihke biila ja gálvobiila leat fasttit roakčanan, dieđihit politiijat. 

Nordlys aviisa čállá ahte persovdnabiila lei gártan geaidnoroggái maŋŋel go lihkohisvuohta ­deaividii ja ahte gálvobiila ges lei fierran alla vielttis meara beallái.

Guovllus ledje goike geainnut, muhto lihkohisvuođabáikkis lei aškkas.

Leaktorádjá lea 80 kilomehtera diimmus. 

 

Norgalaš biillat 

Sihke persovdnabiila ja gálvobiila gullet Norgii. 

– Goappašat biillat leat Norgga registrerejuvvon. Gálvobiilavuoddji lea olgoriikalaš, muhto vuodjá Norgga fitnodaga ovddas, čállet Romssa politiijaguovllus Twitter dieđus. 

-Almmuhus-