Mánnodaga čuovganeapmai duššai nuorra nieida Girona ruvkkes.
Badjelaš gaskaija áigge, mannan ija, vuojahalai nuorra nisu dumper-vuojánii LKAB ruvkkes Gironis. Nisu duššai lihkohisvuođas.
Nuorra nieida barggai BDX fitnodagas mii bargá LKAB ovddas ruvkkes. BDX ii dáhto mánnodatiđida vuos čilget mii dáhpáhuvai ja makkár bargguid oktavuođas lihkohisvuođa dáhpahuvai go politiijat leat ain dutkame ášši.
– Juste dál eat dieđe eambbo go dan maid politiijat leat muitalan midjiide. Nisu lei manname boddolatnjii go lihkohisvuohta dáhpáhuvai. Son sáddejuvvui buohccivissui gos maŋŋel dieđihuvvui ahte lea jápmán, dadjá BDX fitnodaga bargi Fredrik Palmquist NSD:i.
BDX:s lea lagas gulahallan politiijaiguin ja eará guoskevaš fitnodagaiguin ruvkkes.
– Lea dieđusge hui ilgat go dákkár dáhpáhusat dáhpáhuvvet. Min jurdagat mannet nieidda lagamusaide ja ovttasbargoguimmiide, dadjá Palmquist.
