-Almmuhus-
-Almmuhus-
-Almmuhus-
OĐĐASATNuorra boazodoallit čoagganit Anárii

Nuorra boazodoallit čoagganit Anárii

-

-

Odne álgá Gávnnadeapmi 2 Anáris Suoma bealde Sámis. Dat lea golbmasbeaivásaš čoahkkneapmi nuorra boazodolliide.

 

«Gávnnadeapmi 2» ráhkkaneamis lágideaddjit dihtomielalaččat válljen boazodoallu dili fáddan.

 – Olu lean gullan go lean háleštan boazodoalliskihpáriin, ahte olu lea álgán juo oidnot nuppástusat luonddus, nu dat lea hui áigeguovdilis ášši, čilgii Yle Sápmái prošeaktajođiheaddji Áslat Holmberg.

 

Dasa lassin fáttá válljemii váikkuhii ruhtagáldu.

– Okta ágga mainna mii lea ruđa ožžon lea, go mii buvttadit dieđu Árktalaš Ráđi raportta váras (Adaptiation Action for a Changing Arctic, doaim.meark), mii gieđahallá luonddu nuppástuvvama ja mo dasa nuppástuvvamii galgá dustet, muitala Holmberg.

 «Gávnnadeapmi 2» lea boađus ovttasbarggus Suoma Sámi Nuorat suomabeale nuoraidsearvi, Sáminuorra ruoŧabeale, Norgga Boazosámiid Riikkasearvi Nuoraidlávdegoddi ja Riikkaidgaskasaš Boazodoalloguovddáš.

 

Ollu man digaštallat

Dáhpáhussii vurdet 60 nuora miehtá Sámi. Dassážii leat dieđihuvvon 40 nuora, oktan logaldalliiguin ja áššedovdiiguin. Áslat Holmberg čállá iežas Facebook siiddus ahte eanaš oassi oassálastiin leat nieiddat. Konferánsa plánejuvvo dainna lágiin ahte juohke beaivi lea aktivitehta ja lea dihto fádda, nu mo muitalit nubbi nubbái iežaset guovlluid otná beaivvi boazodoalu dili birra ja gullat vásáhusaid mo leat dusten sisabahkkemiid ja rievdadusaid iešguđet guovlluin.

Nuppi beaivvi áššedovdit logaldallet iešguđet rievdadusain mat boazodollui sáhttet boahtit, eahketbeaivvi fas leat bargobájit seamma fátta birra.  Goalmmát beaivvi gieđahallat makkár vejolašvuođat leat váikkuhit servodagas ja mo ráhkkanit boahtteáiggi várás.

– Dál lea buorre vejolašvuohta čoahkkanit, beassat gullat áššedovdiin dan birra ja gullat mo boahtteáiggis sáhttá rievdat ja mo dat de váikkuha boazodollui. Dieđusge smiehttat ahte mo sáhttá bargat daid áššiid buoridan dihte ja mo sáhttá ráhkkanit daid rievdadusaide, muitala Holmberg Yle Sápmái.

 

Ailu Valle ja Amoc guoimmuheaba

Dovddus sámi ráppaartisttat boahtiba čuojahit iežaska musihka maŋŋá go nohket buot formálalaš plánejuvvon lágideamit konferánsa oktavuođas. Lea vuosttáš háve go Ailu Valle ja Amoc doallaba oktasaš konseartta.

 

Gávnnadeapmi

Vuosttaš Gávnnadeapmi lágiduvvui jagis 2007 Gárasavvonis dainna áigumuššan ahte fállat sámenuoraide miehtá Sámi vejolašvuođa oahpásnuvvat ja ságastallat sámi servodaga ja váikkuheami birra. Dalle konferánsii serve nuorat Norgga-, Suoma-, Ruoŧa- ja Ruoššabealde.

 

Sergey Gavrilov

sergey@avvir.no

-Almmuhus-