Juovlabeavdeáigodat lea álgán ja olu restoáŋŋat vižžet liigebargiid. Bargobearráigeahčču muittuha ahte vuollel 18-jahkásaš bargit eai galgga dábálaččat bargat maŋŋel diibmu 21.
– Nuorra bargit galget suddjejuvvot barggu vuostá mii sáhttá leat váralaš sidjiide. Dat mearkkaša ahte galget suddjejuvvot eambbo go ollesolbmot idjabarggus, mii sáhttá addit negatiiva čuozahusaid earret eará dearvvašvuhtii ja sosiála eallimii, dadjá Bargobearráigeahču sekšuvdnahoavda Anette Østmo Farstad.
Bargobirasláhka dadjá ahte bargu gaskal diibmu 21.00 ja 06.00 lea idjabargu. Dan ii leat vuolggasajis lohpi geasage, ii ollesolbmuide fge. Spiehkastagat sáhttet dahkkot jos bargu ii sáhte dahkkot beaivet, nu go restoráŋŋain ja guossuhanbáikkiin.
Leat muhtun spiehkastagat mat dahket ahte nuorat sáhttet bargat maŋŋel diibmu 21. Dat lea earret eará buhtisteapmi, geahppa váktaortnet dahje jos lea oahppošiehtadus hotealla- ja idjadanfitnodagas. Dalle lea maid gildojuvvon vuollel 18-jahkásaččaide bargat guhkit go gaskaidjii.
