Nuorat lohket ođđasiid sosiála mediain, eai ge nu bearehaga neahttaaviissain. Seammás eat luohte nu olu sosiála kanálaide, ja mii liikot, juogadit ja kommenteret unnit sosiála mediain dál go ovdal leat dahkán, čájeha mediaguorahallan man Deloitte Norge lea čađahan.
Nuorat lohket ođđasiid sosiála mediain, eai ge nu bearehaga neahttaaviissain. Seammás eat luohte nu olu sosiála kanálaide, ja mii liikot, juogadit ja kommenteret unnit sosiála mediain dál go ovdal leat dahkán, čájeha mediaguorahallan man Deloitte Norge lea čađahan.
Bearjadaga almmuhuvvui jahkásaš mediaguorahallan, ja lea guđat geardi go dakkár guorahallan čađahuvvo mii guoská norgalaččaid mediageavaheapmái.
Nuoramusat leat sosiála mediain
Stuorámus ođasgáldu gaskal 14- ja 20-jahkásaš nuoraide leat sosiála mediat.
– Ođđa vugiid gávdnat mat olahit nuoramus lohkkiid ja hukset mearkagálvvu, lea mediaid stuorámus prošeakta dán áigge. VG Snapchat-prošeakta lea buorre ovdamearka movt mediaásahusat heivehit nuoramusaid olahit, lohká Joachim Gullaksen.
Lea go neahttahárdin sivalaš?
Logut čájehit maid ahte olbmot eai kommentere nu dávjá ođasartihkkaliid neahtas.
Ollugat eai juogat eai ge liiko artihkkaliid. Unnimus oassi lohká ahte eai loga artihkkaliid mat leat sosiála mediain.
– Orru leamen ahte mii geassádit eret dan aktiivvalaš oassálastimis sosiála mediain, vaikko mii ain leat doppe. Sáhttá go neahttahárdin leat dasa sivvan, jearrá Gullaksen.
Albma ođđasiid
Ollugat áigot máksit áššiid ovddas, ja eanemusat dohkkehit máksit áššiid ovddas mat leat Norggas.
Dearvvašvuohta, dáidda, kultuvra, guoimmuheapmi ja luovos ságat, leat áššit maid ovddas unnimusat gillejit máksit.
– Olbmot sihtet daid albma ođđasiid – gelbbolašvuođa ja dieđuid maidda sáhttá luohttit. Mediaguorahallan čájeha ahte mii áinnas máksit dan ovddas, lohká Joackim Gullaksen.
