Okta viđadasoassi nuorain lohket ahte sii juhket alkohola vai eai dárbbaš jurddašit koronadili birra.
– Ii leat boastut juhkat alkohola muhtomin, muhto jus olmmoš juhká danne go vuorjašuvvá, láittastuvvá dahje leat eará negatiiva dovddut, de ferte ferte álgit váruhit, lohká alkoholadiehtoorganisašuvdna Alkovettorganisasjonen Av-og-til generálačálli Randi Hagen Eriksrud.
Av-og-til organisašuvdna bargá dasa ahte olbmot galget jierpmálaččat jurddášit alkoholageavaheami birra dakkár diliin gos alkohola dahká riskka dahje váivvádusa earáide. Sii háliidit unnidit daid negatiiva váikkuhusaid maid alkoholageavaheapmi sáhttá dahkat servvodahkii, ja dahkat árgabeaivvi oadjebassan buohkaide.
Rievdadan alkoholadábiid
Guorahallan maid Av-og-til organisašuvdna lea dahkan čájeha ahte 21% nuorain gaskal 18-24 jagi leat rievdadan alkoholadábiid maŋŋel go koronadávda leavvagođii.
– Guhkit áigge vuolde mii leat oaidnán ahte nuorat čuovvulit ođđa treandda ja juhket unnit alkohola, juogo alkoholakeahttes juhkosiid dahje juhkosiid main lea unnit alkoholaproseanta. Dat lea hirbmat buorre. Seammás mii oaidnit ahte leat ollu nuorat geat muitalit sis leat psyhkalaš dearvvašvuođaváttisvuođat, ja muhtumat dáin nuorain geavahit alkohola váidudan dihte dáid váttisvuođaid. Dát sáhttá leahkit álgu stuorát váttisvuođaide, dadjá Eriksrud preassadieđáhusas.
