Norgga Sámiid Riikkasearvi ja Olgešbellodat vuite skuvlaválgga Guovdageainnus. Goappaš bellodagain ledje nuorra evttohasat digaštallamis ja dás beasat lohkat makkár áššit nuoraide ledje dehálačča go jienastedje:
Norgga Sámiid Riikkasearvi ja Olgešbellodat vuite skuvlaválgga Guovdageainnus. Goappaš bellodagain ledje nuorra evttohasat digaštallamis ja dás beasat lohkat makkár áššit nuoraide ledje dehálačča go jienastedje:
Gaskavahkku skuvlaválggas Sámi joatkkaskuvllas ja boazodoalloskuvllas Guovdageainnus ledje Norgga Sámiid Riikkasearvi ja Olgeš mat olahedje eanemus jienaid.
Skuvlaválgga oktavuođas lei maid digaštallan masa serve sihke Sámedikki ja Stuoradikki bellodagat.
Sámedikkeválggas vuittii Norgga Sámiid Riikasearvi (NSR) 36,4 proseanttain. Olgeš fas vuittii stuoradiggeválgga 30,6 proseanttain. Maren Benedicte Storslett ovddastii NSR ja Nils Kristian Winther ovddastii Olgeža. Goappašagat leaba 21-jahkásaččat, ja nagodeigga čohkket eanemus jienaid joatkkaskuvllas Guovdageainnus.
Duhtavaš stuoradiggeválggain
Winther lea Nuortaguovllu válgabiirre vuosttaševttohas Olgeža listtus. Son ii leat stuoradiggelisttus.
– Lea buorre dovdu, ja čájeha ahte Guovdageainnu nuorat maid háliidit nanu ráđđehusa, mii berošta sámi servodagas ja sámi ealáhusain, lohká Winther.
Sámediggeválggas oaččui Olgeš 9,1 proseantta jienain, njealjádin eanemus. Muhto Winther lohká gal ieža duhtavažžan dainna maid, vaikko livččii sáhttán buoret boađus.
– Mii fertet bargat vel eambbo dáid maŋemuš beivviid ovdal válgga, vai mis šaddá gievrras joavku Sámedikkis, lohká son.
Nuorat ovddastedje
Sihke Olgežis ja NSR:s ledje nuorat mielde digaštallamis.
– Jáhkát go skuvlaválggas mannan bures go ieža leahppi nuorat?
– Dieđusge. Jáhkán lea dehálaš ahte nuorat oidnet ahte eará nuorat beroštit politihkas, beaivválaš áššiin ja movt daid čoavdit.
Winther rámpo maid NSR ovddasteaddji, Maren Benedicte Storslett.
– Son dagai buori barggu, lei čielggas, ja ovddidii NSR oainnuid bures. In dieđe lei go su vuosttaš digaštallan, muhto son lei čeahppi, lohká Nils Kristian.
Vihtta oahppi
Ovdalaš go galge jienastit de jearahalai Ávvir muhtun ohppiid geat galge jienastit, ja man vuođul mearridedje maid jienastit.
Jo Ante Siri (16)
– Munnje lea deháleamos ášši giđđalodden.
Sara Katrine Aleksandersen (16)
– Munnje leat boazodoalloáššit ja areálaáššit hui dehálaččat. Mun in dieđe sihkkarit man galggan jienastit.
Johan Nikolai Triumf (16)
– Boazodoallu lea guovddáš maid jurddašan, dat lea eanaš maid mun jurddašan.
Anne Majjen Buljo (17)
– Eanaš luonddugáhtten ja skuvlavázzin, ja Norgga boahtteáigi leat munnje dehálaš áššit go galggan jienastit. Mun in dieđe vel man galggan jienastit.
Sunna Marie Joakimsen (15)
– Dálkkádatáššit ja sámi áššit, nu go giđđalodden leat dehálaš áššit. Maiddái olu giela birra lea dehálaš. Mun in dieđe vel maid galggan jienastit.
