Ođđa dutkan čájeha ahte olu nuorat háliidivčče rievdadit eallindábiid, muhto eai máhte.
Dutkan čájeha ahte nuorat eai dieđe movt borrat dearvvašlaččat ja movt lášmmohallat. Dan dieđiha Romssa universitehta.
Maiddái nuorat geat leat skuvlačeahpit, eai nagot doalahit dábiid.
– Dat čájeha ahte nuorat geat fárrejit ruovttuin, eai dieđe movt ráhkadit dearvvašlaš ja hálbbes biepmu. Sii eaige máhte organiseret biebmodábiid ja hárjehallandábiid, lohká Romssa universitehta stipendiáhtta Anne Sofie Sand.
Son lea aiddo almmuhan artihkkala BMC Public Health gos lea jearahallan nuoraid, sihke dábálaš ja buoiddit nuoraid. Son lea jearran mii sin movttiidahttá ja hehtte iežaset eallindábiid rievdadeamis.
Hirpmáhuhtti
Vástádusaid maid oaččui, hirpmáhuhttá sihke Sand ja su bagadalli, Nina Emaus.
– Dat mii lei miellagiddevaš, nuorain lea hállu deaddit dábálaš meari. Sii háliidit buriid eallindábiid, ja dearvvašlaččat borrat, muhto sis ii leat máhttu dan ollášuhttit, lohká Emaus. Son deattuha ahte lea sáhka nuorain geat leat fárren eret ruovttuin.
Váttes agis
Guorahallan čájeha maid ahte nuorat vásihit huša ja beare unnán ođđet. Dat sáhttá maid buoidudit. Dasa lassin leat dearvvašlaš biepmut divrasat, ja nuoraid mielas lea divrras hárjehallanguovddážiidda searvat.
Nuorat geat guđđet ruovttuideaset leat váttes agis, olu vuordámušat čadnon alit ohppui, sosiála oktavuođaide ja hápmái. Ja de galget vel ieža birget.
– Mii oaidnit maid ahte nuorat geat leat buori oahpu gazzame, sáhttet spiehkastit buriin dábiin, lohká Sand.
Skuvllas oahpahit
Son jurddašallá maid sáhtášii go vuođđoskuvla eará ládje oahpahit vai nuorat leat ráhkkanan rávisolbmoeallimii.
– Lea olu maid skuvllas sáhtáše bargat, muhto maiddái olggobealde skuvlla. Geahča beare kioskkaid, buoiddes ja hálbbet biepmut nu go márffit ja bolját. Dasa lassin orrot nuorat dávjá unnit ásodagažiin, gos soitet dušše dakkár gievkkanat gos lea mikrobárroomman, lohká Sand.
