Badjel bealli, 54 proseantta, nuorain mieđihit ahte eai máša diktit telefovnna orrut vuojidettiin. Trygg Trafikk vuorjašuvvá dainna ovdánemiin.
Dan čájehit varas logut stuora nuoraidiskkadeamis man Opinion lea čađahan Gjensidige dáhkádusa ja Trygg Trafikk ovddas. Oktiibuot badjel 2000 nuora, gaskal 15- ja 24-jahkásaččat, leat vástidan dan iskkadeami.
– Go ii leat doarvái áicil lea okta váldosivain jápminlihkohisvuođaide Norgga luottain. Telefovdna lea dađi bahábut okta ákkain dasa. Ii leat vejolaš kombineret telefovdnageavaheami dorvvolaš vuodjimiin luotta alde, ii nuoraide ge. Eai leat dušše sii geat rihkkot lága, muhto lea vuorjašuhtti go badjel bealli ođđa vuddjiin čuggot telefovnna vuojidettiin, dadjá Trygg Trafikk fágadirektevra, Tanja Loftsgarden, preassadieđáhusas.
Dárbbahit garrasit regulerema
Vaikko dál lea lobiheapme doallat telefovnna gieđas vuojidettiin, de lea Trygg Trafikk ovttas geaidnopolitiijaiguin dáhtton čielgasit njuolggadusaid.
– Dálá teknologiijain sáhttá politiijaide leat váttis váldit mobiilageavaheami biillas. Dálá láhkanjuolggadus lea boaris, danne leat dáhtton justiisaministara ja johtolatministara čielggasin dahkat mii lea lohpi ja mii ii leat. Okta dehálaš rievdadus lea ahte šaddá áibbas lobiheapmin doallat telefovnna go vuodjá. Dakkár presiseren dahká álkibun politiijaide giehtaguššat lága, muhto maid vuddjiide ipmirdit mii lea lohpi. Dasa lassin ávžžuhit buohkaid bidjat telefovnna biilamodusii dahje «ale vuorjja» funkšuvdnii, de ii civkke telefovdna vuojidettiin, dadjá Loftsgarden
Stivrejit musihka telefovnnain
Iskkadeapmi čájeha ahte nuorain lea čieža diimmu šearbmageavaheapmi beaivválaččat. De sáhttá leat váttis bidjat telefovnna eret vuojidettiin.
– Buohkat dihtet ahte ii leat lohpi telefovnna doallat gieđas vuojidettiin. Liikká vástidit 54 proseantta nuorain geain leat jearran ahte geavahit telefovnna lobiheamet. Eatnasat stivrejit musihka dahje gehččet irggi/moarsi dahje olbmáid dieđuid. Beroškeahttá ulbmiliin, de dat sáhttá dagahit lihkohisvuođa. Unna geahčestat telefovdnii dagaha ahte ii oainne mii johtolagas dáhpáhuvvá, dadjá Gjensidige dáhpáhusa Skade Motor direktevra, Elisabeth Ingvaldsen.
