-Almmuhus-
KULTUVRANuorat almmuhit árgabeaivvi divttaid

Nuorat almmuhit árgabeaivvi divttaid

-

-

Mannan giđa deaivvadedje 30 Lulli- ja Ubmisámi nuorat giellalávgumii Liksjuonas, man Liksjuon sámegielat oahpaheaddjit lágidedje. Boađusin lea girji mii almmuhuvvo duorastaga.

Giellalávgumis čálle nuorat divttaid mat dál leat čohkkejuvvon ovtta girjái mii lea golmma gillii; «Noerh Tjaelieh / Nuarah Tjállieh – Unga Samer Skriver».

Girji lea dárbbašlaš oassi sámi girjjálašvuođas, go Ruoŧas almmuhuvvo sullii okta sámegiel girji juohke viđat jagi, ja čájeha movt sámi nuorat geavahit gielaset vugiin mii sáhttá sámi giela nannet, čállá Liksjuon Sámiensiäbrrie preassadieđáhusas.

 

Árgabeaivvi divttat

Ubmisámegiella eatnigiellan hupmet unnit go 20 olbmo, ja sii geain lea lullisámegiella eatnigiellan leat vuollel 600 olbmo. Gávdno stuora beroštupmi dál ealáskahttit sámi gielaid nuoraid gaskkas, ja dan duođašta dát girji.

Dat 30 nuorra girječálli leat miehtá Västerbottenis eret ja leat ovttas Liksjuon ja Vilhelmina oahpaheddjiiguin, ja Dearna giellaguovddáža giellaberošteddjiiguin ovttas ráhkadan dárbbašlaš oasáža sámi girjjálašvuhtii, čállá lágideaddji preassadieđáhus.

Árgabeaivvi divttat, giellaillu ja ráhkisvuohta lulli- ja ubmisámegillii seaguhuvvo oktii, mas oasit leat ruoŧagillii.

 

Sávvá nuoraid joatkit giellabargguin

Girji ii čájet dušše sámi nuoraid jurddašeami, muhto lea vuogas geavahit oahpahanreaidun dan guovtti sámi rašimus gillii.

Oahpaheaddjit geat barget nuoraiguin oaivvildit ahte lea dehálaš ráhkadit girjjálašvuođa ja oahppogirjjiid nuorra sámiide mat leat heivehuvvon sidjiide, ja ahte gávdnojit girjjit sámegillii maid buot sámit sáhttet gávdnat, vaikko sámegiella lea eatnigiellan dahje nubbingiellan.

– Mun sávan ahte girji nanne min nuoraid sámi identitehta, seammás go lean sihkar ahte mii movttiidahttit sin aktiivvalaččat bargat gielain boahtteáiggis, sihke čálalaččat ja njálmmálaččat,  go atnit nuoraid čállosiid árvvus ja almmuhit girjin, dadjá Liksjuon suohkana sámegieloahpaheaddji ja girjji redaktevra Johan Sandberg McGuinne.

Lea Liksjuon Sámiensiäbrrie mii almmuha girjji, mii leat almmuhan gaskamearálaččat ovtta girjji 2015 rájes. Girji ovdanbukto Liksjuon sámi searvvi sámi vahkku doaluin, čakčamánu 27. beaivvi eahkedis.

-Almmuhus-