Suoma nuoraidráđđi lágida seminára sámelága ođasmahttima birra Helssegis.
Seminára fáddá lea «Sámenuoraid boahttevuođa huksen». Semináras ovdanbuktojuvvojit earret eará sámelága evttohuvvon ođasmahttimat, áššedovdiid sáhkavuorut ja ságastallat lága ođasmahttimis erenoamážit sámenuoraid geahččanguovllus.
– Nuoraidráđđi háliida loktet ovdan sámediggelága mearkkašumi sámenuoraide ja fállat arena ságastallamii lága ođasmahttimis mearrideddjiiguin, muitala nuoraidráđi ságadoalli Anni-Sofia Niittyvuopio.
Áššedovdit hállet
Seminára lea riikabeivviid bargiide ja mediai ja ordnejuvvo ovttas Olmmošvuoigatvuođaguovddážiin. Dan sáhttá maiddái čuovvut neahta bakte, dieđiha Suoma Sámediggi preassadieđáhusas. Seminára lágiduvvo golggotmánu 11. beaivvi Pikkuparlameantta Álbmotinfos.
– Dilálašvuođas hállet máŋggat olmmošvuoigatvuođaid áššedovdit, geaiguin leage mávssolaš beassat ságastallat sámenuoraid olmmošvuoigatvuođaid ja boahttevuođa geahččanguovllus, dádjá nuoraidráđi várreságadoalli Maria Mäkinen Suoma Sámedikki preassadieđáhusas.
