Sámedikki nuoraidpolitihkalaš lávdegotti jođiheaddj Ánná Káisa Partapuoli muitala preassadieđáhusas ahte sii háliidit ahte sámi nuorain galgá leat oadjebas bajásšaddanbiras. Dál lea lávdegoddi álggahan prošeavtta «Trygt Sápmi» ja bovdejit sámi nuoraid oasálastit kursii gos áigot bargat eastadanbargguid seksuála veagalválddálašvuođa ja rádjerasttildeaddji láhttenvugiid vuostá.
Sámedikki nuoraidpolitihkalaš lávdegotti jođiheaddj Ánná Káisa Partapuoli muitala preassadieđáhusas ahte sii háliidit ahte sámi nuorain galgá leat oadjebas bajásšaddanbiras. Dál lea lávdegoddi álggahan prošeavtta «Trygt Sápmi» ja bovdejit sámi nuoraid oasálastit kursii gos áigot bargat eastadanbargguid seksuála veagalválddálašvuođa ja rádjerasttildeaddji láhttenvugiid vuostá.
Sámedikki nuoraidpolitihkálaš lávdegoddi lea beannot jagi bargan prošeavttain «Trygt Sápmi» dahje «Oadjebas Sápmi».
Dál lea prošeakta ollen dan rádjái ahte sáhttet eará sámi nuoraid bovdet oasálastit bargguide mat leat dehálaččat sidjiide, nu go veagalváldimat Sámis.
Eastadit seksuála veagalválddálašvuođa
Sámedikki nuoraidpolitihkkalaš lávdegotti jođiheaddji Ánná Káisa Partapuoli muitala ahte sii háliidit ahte sámi nuorain galgá leat oadjebas bajásšaddanbiras.
Prošeavttain sii áigot eastadit veagaldválddálašvuođa Sámis, ja dál viimmat besset bovdet sámi nuoraid kursavahkkolohppii sin lusa bargat eastadanbargguid seksuála veagalválddálašvuođa ja rádjerasttildeaddji láhttenvugiid vuostá.
– Mii háliidit ahte sámi nuoraid galgá leat oadjebas bajasšaddanbiras ja ahte galget dovdat oadjebassan vaikko gos servodagas. Danne leat mii hui olu návccaid bidján «Trygt Sápmi» prošektii, mii galgá oažžut nuoraid šaddat dihtomielalažžan makkár hástálusat mis leat daid áššiiguin ja maiddái movt mii konkrehtalaččat galgat gieđahallat dakkár áššiid, muitala nuoraidpolitihkalaš lávdegotti jođiheaddji Ánná Kaisa Partapuoli.
Naná resursajoavku
Mánáid-, nuoraid- ja bearašdirektoráhtta (Bufdir), Nuoraidorganisašuvnnaid riikasearvi (LNU) ja SÁNAG (Sámi našunála gealboguovddáš-psyhkalaš dikšu) leat Sámedikki nuoraidpolitihkalaš lávdegotti ovttasbargoguoimmit dán prošeavttas.
Bufdir doarju prošeavtta ruđalaččat ja lea ovttas Nuoraidorganisašuvnnaid riikaservviin ja SÁNAG:in nana resursajoavkun dán fáttás.
Partapuoli lohká dan geahpádussan go leat nana ja čeahpes olbmot mielde dan barggus.
– Lean hui giitevaš go leat nu olu čeahpes fágaolbmot geain lea jáhkku dán prošektii. In jáhke ahte šattašii nu buorre kursa jus sii eai livčče das mielde ja lávdegotti bealis sáhtán lohkat ahte mii sávvat ahte dát prošeakta sáhttá oažžut johtui viiddis kollektiivvalaš beroštumi dasa mo eastadit veagalválddálašvuođa Sámis. Veagalváldin ii ábut čihkkojuvvot, dan birra ferte hupmat. Dákkár áššit fertejit duođas váldot ja dat gáibida áŋgiruššama olles servodagas, loahpaha Partapuoli preassadieđáhusas.
