-Almmuhus-
OĐĐASATNuoraidkonferánsa sámegiela ja teknologiija birra

Nuoraidkonferánsa sámegiela ja teknologiija birra

Journalista

-

-

Giellabiellje lea nuoraidkonferánsa sámegiela ja teknologiija birra.

Geassemánu 25.-26. beivviid dán jagi čoagganit nuorat Giellabiellje konferánsii hupmat sámi gielaid boahtteáiggi birra Stormen girjerádjosis Bådåddjos. Sámediggi ja Gieldda- ja guovlludepartemeantta (KDD) áigot čohkket nuoraid ságastallamiidda sámi gielaid, gaminga ja teknologiija birra.

– Leat mii nuorat geat galgat doalvut sámi gielaid viidásabbot. Mo nuorat váldet atnui giela vuolgá das makkár vejolašvuođat leat olámuttos ja mat heivejit sin dárbbuide. Nuorat geavahit olu áiggi digitála máilmmis, danne berrešii sáhttit kombineret giela fálaldagaiguin nu go gaming-, filbma- ja teknologiija giela boahtteáiggi dáfus, dadjá Noereh Emilie Biti-Jessen preassadieđáhusas.

KDD ja Sámedikkis lea lagas ovttasbargu sámi nuoraidorganisašuvnnain Noereh ja Sámedikki nuoraidlávdegottiin (SUPU). Sámedikki nuoraid politihkalaš lávdegotti Nora Nansmork ja Noereh Emilie Biti-Jessen leaba leamaš mielde plánemis ja galgaba maid leat mielde konferánssa áiggi.

Hævvi, Isalill Kolpus ja Sami Gamers leat guossit konferánssas. Miellagiddevaš pánelaságastallamat, «kræsjkurs» bihttánsámegielas ja muhtun eará sámegielain, oahpistankursa neahttasiidoprográmmeremis ja kursa mo prográmmeret spealuid.

– Prográmma speadjalastá vejolašvuođaid ja hástalusaid mat mis leat vuordimis. Go mis leat lassánan vejolašvuođat geavahit giela digitála máilmmis, de ferte maiddái viidodat vejolašvuođain boahtit ovdán! Dat buot deháleamos lea liikká ahte nuoraid jienat miehtá Sábme bohtet ovdán go mii galgat gávnnahit maid mii háliidit boahtteáiggis, dadjá Sámedikki nuoraid politihkkalaš lávdegotti Nora Nansmork.

Ovttasráđiid Márkomeannuin lágiduvvo konsearta DJ Ailloin oktan gussiiguin distat eahket, geassemánu 25. beaivvi, ja Sámi Allaskuvla almmuha sámi ofelaččaid boahttevaš skuvlajahkái.

-Almmuhus-