Muhtin skohtervuoddji vujii ealgga ala Kárášjoga alde odne eahkes.
Ođastuvvon diibmu 23.17: Finnmárkku Buohcciviesu gulahallanráđđeaddi Eilert Sundt muitala nuppi dán guoktásis sáddejuvvon helikopteriin UNN buohccivissui Tromsii.
Nuppi olbmo birra ges ii sáhte Sundt muitalit maidege, go eai leat vuos sihkkarat galgá go dát olmmoš sáddejuvvot gosage, vai galgá go orrut geahču vuolde Kárášjoga dearvvašvuođaguovddážis. Sundt ii ge muital man garrasit goabbáge lea roasmmehuvvan.
Vuodján ealgga njeaiga
Odne eahkes geavai skohterlihkohisvuohta Kárášjoga alde. Muhtin lea skohteriin vuodján ealgamiesi ala ja galgá leat roasmmehuvvan. Dát lea dáhpáhuvvan Guhkesgura bokte.
– Dat orroba vuodján ealgga ala, lea okta skohter mas ledje guovttis alde. Joga alde lea ealgamiessi man oaidnit ahte lea vuddjon, lohká Kárášjoga politiijabálvá Frank Nilsen.
Nilsen muitala báikkis fitnan Seaking helikoptera, mii vieččai ainjuo nuppi dán guoktásis.
Buolaš
Dál leat birrasiid 25 buolašgráda Kárášjogas, ja lihkohisvuohta dáhpáhuvai sullii beal logis eahkedis.
– Go ná buolaš lea de olmmoš jođánit galbmo, lohká Nilsen.
Nilsen ii loga diehtit man garrasit skohtervuoddji guovttos leaba roasmmehuvvon.
Twitteris čállet politiijat ahte goappašagat leaba vižžon ja dolvojuvvon doaktáriid háldui.
