Boahtte giđa sáhttet buot NTNU, dahje Norgga teknihkalaš ja luonddudieđalaš universitehta studeanttat, váldit 7, 5 oahppočuoggá «MUSV1108 – Joik, samisk musikk og samspill» -fáttás.
Dat lea de nubbi sámi oahppofáddá NTNU:s. «LÆR2004 – Samiske tema i skolen» lea juo sis sámi oahppofáddán.
– Mii sávvat nagodit fállat oahpahanvuogi mii speadjalastá sámi kultuvrra, ja mii čađahuvvo juoigama eavttuid mielde, dadjá NTNU musihkkainstituhta stipendiáhtta Viktor Govasli Wilhelmsen.
Son deattuha ahte eai leat vel gárvvisin plánen oahppofáttá, muhto das lea praktihkalaš oahpaheapmi.
– Ii leat sihkar lea go riekta lágidit dán oahpu nu movt lea dábálaš, auditoriaoahpaheapmin. Mii jurddašit baicca ahte ferte fuomášumi bidjat juoiganmelodiija oahppamii, ja oahppat dan mearkkašumi praktihkalaš oahpaheami bokte, dadjá son.
Son ii loga gal ovttage šaddat dievaslaš juoigin dainna oahpuin, muhto juoigat gal sáhttá oahppat go ieš geahččaladdá.
– Ii leat ovdamearkka dihte nu ge ahte 12 oahppočuoggá jazzas, dahká du jazzagitáračuojaheaddjin.
Son muitala vel ahte dál ii leat vuos plána álggahit lassioahpuid juoigamis, muhto dat sáhttá dáhpáhuvvat boahtteáiggis. Dán juoiganfáddái sáhttá vaikko gii dieđihit, go lea rabas fáddá mii ii leat fágagáibádussan.
