– Ferten konstateret ahte sihke NSR ja Bargiidbellodat Sámedikkis mannet boazodoalu earániid juohke háve go fal sáhttet, lohká Ovddádusbellodaga sámediggeáirras Arthur Tørfoss, ja čujuha dan stuora beroštupmái mii lea Nussira ja Gumppenjuni ruvkeáššiin.
– Ferten konstateret ahte sihke NSR ja Bargiidbellodat Sámedikkis mannet boazodoalu earániid juohke háve go fal sáhttet, lohká Ovddádusbellodaga sámediggeáirras Arthur Tørfoss, ja čujuha dan stuora beroštupmái mii lea Nussira ja Gumppenjuni ruvkeáššiin.
– Mun sáhtán deattuhit ahte Fálesnuori suohkan, mii lea mearrasámi servvodat, lea čielgasit dadjan ahte dorjot ruvkedoaimma. Falesnuori olbmot orrot dán guovllus birra jagi. Boazodoallu lea doppe muhtin áigge. Dás ii leat stuoraservvodat vuostálaga, muhto guokte sámi joavkku vuostálaga áššis, lohká Tørfoss preassadieđáhusas man Ovddádusbellodat lea sádden.
Tørfoss lohká ahte juohke háve go lea meahccegeavaheami birra ášši, de leat dát guokte bellodaga doarjume boazodoalloáššiid. Sámi meahcásteapmi ii leat dušše boazodoallu, deattuha Tørfoss.
– Eai nu stuorrát
Sámedikki Ovddádusbellodat konstatere ahte buot heajos váikkuhusat mat leat guolásteapmái, boazodollui, birrasii, sámi kultuvrii ja servvodahkii eai leat nu stuorrát ahte ii čáhkket ruvkedoaimma Nussirii ja Gumpenjunnái Riehpovuonas.
Ovddádusbellodat doarju ruvkedoaimma ásaheami daidda guovlluide, doarju sin geat ásset suohkanis, ja doarju FeFo mearrádusa áššis, čállá Ovddádusbellodat preassadieđáhusas.
Eanangeavaheamis sáhka
Bargiidbellodaga parlamentáralaš jođiheaddji Ronny Wilhelmsen lohká Bargiidbellodahkii lea deháleamos ahte sii čuvvot áššemeannudeami nu go galget.
Dasto son deattuha ahte maid mannan vahkkus mearridedje Sámedikkis, lea eanangeavaheami rievdadeapmi.
– Dat mearkkaša ahte maid mii meannudeimmet guoskkai dušše meahccái. Eai meahcis leat gal ámmát guolásteaddjit. Dás lea boazodoallu cealkán ahte sin doaibma unniduvvo. Jus mearrasápmelaččat livčče cealkán ahte sin geavaheapmi unniduvvo, de livččiimet sin beali čuollan, lohká Wilhelmsen.
Son lohká ahte lea dehálaš ahte čuvvot ILO 169 konvenšuvnna meannudeamis ja ahte gulaskuddan čuovvuluvvo.
