Norrbottena leanas lea dál disdaga dieđihuvvon oktiibuot 29 olbmos koronadávda, covid-19. Viđas sis leat buohcceviesus divššus. Muhtimat leat dearvvašnuvvan ja earát leat fas ruovttus erremis. Nu dieđihit Regiovdna Norrbottenis.
Lei mannan bearjadaga go Regiovdna Norrbotten dieđihii preassadieđáhusa bakte ahte koronadávda njoammu olbmuid gaskkas Norrbottenis maid. Muhto Regiovdna Norrbottenis eai dieđit gos buohccán olbmot leat leanas.
– Dat njoammu johtilit dál. Mii sáhttit ovttas bissehit njoammuma. Lea buot ássiide deaŧalaš ahte čuvvot eiseválddiid rávvagiid, dadjá Anders Nystedt, gii lea Regiovdna Norrbottena njoammudávddaid váldodoavttir.
Lea deŧalas ahte ii njoamo menddo johtilit, čállet Regiovdna Norrbottena eiseválddit preassadieđáhusas. Sii čállet maid ahte sii leat ráhkkanan dikšut olbmuid geain lea covid-19 dávda. Sii leat maid huksen sierra dikšunbáikkiid Norrbottena buohcceviesuide, earret eará Bihtanii.
– Mii leat gergosat váldit vuostá olbmuid dikšumii, muhto mii sáhttit buohkat eastadit njoammuma, dadjá Nystedt.
