Regiovdna Norrbotten dieđiha mánnodaga iđđedis ahte nubbi olmmoš vel lea Norrbottena leanas jápmán covid-19 dávdii.
Dál leat oktiibuot guokte olbmo jápmán dávdii Norrbottena buohcceviesuin ja oktiibuot 53 olbmos lea dieđihuvvon dávda regiovnnas.
Njealji doaktáris Norrbottenis lea maid dieđihuvvon koronadávda, čállá SVT Norrbotten. Guovttis sudnos galgaba njommojuvvon astoáiggis ja guovttis fas barggus.
– Buohcceviesuid bargiide sáhttá njoammut barggus, mii lea stuora riska, dadjá Regiovdna Norrbottena njoammuneastadandoavttir Anders Nystedt SVT Norrbottenii.
Nannejit dikšunvejolašvuođa
Regiovdna Norrbotten čállá maid preassadieđahusa bokte ahte sii nannejit dikšunvejolašvuođa leanas. Dat mearkkaša ahte bargit, resurssat ja rusttegat juhkkojuvvojit dárbbu mielde leanas.
Regiovdna Norrbottenis navdet ahte Norrbottenis leat 3000-5000 olbmos covid-19 dávda.
– Min nannet dikšunvejolašvuođa Norrbottenis go dilli lea rievdan ja dat čuohcá min doibmii. Dál galgá álkit juohkit resurssaid leanas, dadjá Anna-Stina Nordmark Nilsson, gii lea regiovdnadirektevra.
